قازاقستاندا بىلتىر مۇگەدەكتىگى جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردى (بۇدان ءارى – ءماج) تولەۋگە رەسپۋبليكالىق بيۋدجەتتەن 655،7 ملرد تەڭگە جۇمسالدى. بۇعان قوسىمشا مەملەكەتتىك الەۋمەتتىك ساقتاندىرۋ قورىنان (بۇدان ءارى – ءماسق) ەڭبەككە قابىلەتتىلىگىنەن ايىرىلۋ جانە اسىراۋشىسىنان ايىرىلۋ بويىنشا شامامەن 90،3 ملرد تەڭگە سوماسىنا الەۋمەتتىك تولەمدەر جۇزەگە اسىرىلدى، دەپ حابارلايدى Aqshamnews.kz ءتىلشىسى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، 2025 جىلدىڭ قورىتىندىسىنا سايكەس مۇگەدەكتىگى بويىنشا ءماج الۋشىلار سانى شامامەن 553،9 مىڭ ادامدى، اسىراۋشىسىنان ايىرىلۋ جاعدايى بويىنشا – شامامەن 191،9 مىڭ ادامدى قۇرادى.
«مۇگەدەكتىگى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىكتىڭ توبىنا جانە سەبەبىنە، سونداي-اق ءتيىستى قارجى جىلىنا ارنالعان «رەسپۋبليكالىق بيۋدجەت تۋرالى» زاڭدا بەلگىلەنگەن ەڭ تومەن كۇنكورىس دەڭگەيىنىڭ شاماسىنا بايلانىستى بولادى.
اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى قايتىس بولعان اسىراۋشىنىڭ اسىراۋىنداعى ادامداردىڭ سانىنا، قايتىس بولۋ سەبەپتەرىنە جانە ەڭ تومەن كۇنكورىس دەڭگەيىنە بايلانىستى بولادى.
بۇدان باسقا، مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا الەۋمەتتىك تاۋەكەلدەر تۋىنداعان جاعدايدا ءماسق-دان الەۋمەتتىك تولەمدەر جۇزەگە اسىرىلادى. وسىلايشا، 2025 جىلدىڭ قورىتىندىسىنا سايكەس 101،3 مىڭ ادام ەڭبەك ەتۋ قابىلەتىنەن ايىرىلۋ بويىنشا الەۋمەتتىك تولەم، ال 68،6 مىڭعا جۋىق وتباسى اسىراۋشىسىنان ايىرىلۋ بويىنشا الەۋمەتتىك تولەم الدى.
تولەمدەردىڭ مولشەرى جەكە جانە مىنالارعا بايلانىستى: سوڭعى 2 جىلداعى ءماسق-عا الەۋمەتتىك اۋدارىمدار جۇرگىزىلگەن ورتاشا ايلىق تابىس، ەڭبەككە قابىلەتتىلىگىنەن ايىرىلۋ كوەففيسيەنتتەرى، اسىراۋىنداعى ادامدار سانى، مىندەتتى الەۋمەتتىك ساقتاندىرۋ جۇيەسىنە قاتىسۋ ءوتىلى جانە تابىستى اۋىستىرۋ»، – دەلىنگەن مينيسترلىك حابارلاماسىندا.
ۆەدومستۆو مالىمەتىنشە، بۇل تولەمدەر رەسپۋبليكالىق بيۋدجەتتەن تولەنەتىن ۇقساس جاردەماقىلارعا قوسىمشا جۇزەگە اسىرىلادى.
مۇگەدەكتىگى جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى 2026 جىلعى 1 قاڭتاردان باستاپ ەڭ تومەن كۇنكورىس دەڭگەيىنىڭ ۇلعايۋىنا بايلانىستى 10%-عا ءوستى. ق ر ۇكىمەتىنىڭ شەشىمى بويىنشا ەڭبەككە قابىلەتتىلىگىنەن ايىرىلۋ جانە اسىراۋشىسىنان ايىرىلۋ بويىنشا ءماسق-دان تولەنەتىن تولەمدەردىڭ مولشەرى دە 10%-عا ارتتى.
وسىلايشا، وسى جىلى جالپى اۋرۋدان مۇگەدەكتىگى بويىنشا ءماج مولشەرى 1-توپ ءۇشىن – 111 872 تەڭگەنى، 2-توپ ءۇشىن – 89 498 تەڭگەنى، 3-توپ ءۇشىن – 61 021 تەڭگەنى قۇرايدى.
2026 جىلىعى 1 قاڭتارداعى جاعداي بويىنشا ەڭبەككە قابىلەتتىلىگىنەن ايىرىلۋ بويىنشا الەۋمەتتىك تولەمدەردىڭ ورتاشا مولشەرى 72 409 تەڭگەنى، اسىراۋشىسىنان ايىرىلۋ بويىنشا – 73 306 تەڭگەنى قۇرايدى.