قازاقستاننىڭ اۆياسيالىق اكىمشىلىگى وتاندىق اۋە تاسىمالداۋشىلارىنا يران اۋماعىنىڭ ۇستىمەن رەيستەر ورىنداۋعا ۋاقىتشا شەكتەۋ ەنگىزدى، دەپ حابارلايدى Aqshamnews.kz ءتىلشىسى.
قازاقستاننىڭ اۆياسيالىق اكىمشىلىگى يران اۋە كەڭىستىگىندەگى قاۋىپسىزدىك تاۋەكەلدەرىنىڭ ارتۋىنا بايلانىستى قازاقستاندىق اۋە كومپانيالارىنا بۇل ايماق ارقىلى ۇشۋعا ۋاقىتشا تىيىم سالدى. ءتيىستى شەشىم ءقاا تاراتقان رەسمي اقپاراتتا جاريالاندى.
ۆەدومستۆونىڭ مالىمەتىنشە، قازىرگى جاعدايدا يراننىڭ اۋە كەڭىستىگىن پايدالانۋ قاتاڭ شەكتەلىپ وتىر. تەك ەرەكشە وكىم بەرىلگەن جاعدايدا عانا بۇل تالاپتان تىس شەشىم قابىلدانۋى مۇمكىن.
«بارلىق رەيستەر ءقاۋىپتى ايماقتى اينالىپ وتەتىن بالاما باعىتتار ارقىلى ورىندالادى. جاعداي قازاقستاننىڭ اۆياسيالىق اكىمشىلىگىنىڭ تۇراقتى باقىلاۋىندا. ايماقتاعى احۋال وزگەرگەن جاعدايدا قوسىمشا شارالار قابىلدانادى»، – دەلىنگەن رەسمي حابارلامادا.
ەسكە سالايىق، يرانداعى جاعداي 2025 جىلعى 28 جەلتوقساندا كۇرت شيەلەنىسە ءتۇستى. الدىمەن تۇرعىندار باعانىڭ ءوسۋى مەن ۇلتتىق ۆاليۋتانىڭ قۇنسىزدانۋىنا نارازىلىق بىلدىرسە، كەيىن بۇل تولقۋلار 2022 جىلدان بەرى جالعاسىپ كەلە جاتقان جاپپاي نارازىلىقتاردىڭ جاڭا كەزەڭىنە ۇلاستى. سوڭعى ءبىر جىلدا اقش دوللارىنىڭ باعامى شامامەن 80 پايىزعا قىمباتتاعان.