ەكىباستۇز قالاسىندا 17 جاستاعى ءجاسوسپىرىم ۇل مەن قىزدىڭ قايتىس بولۋىنا بايلانىستى قىلمىستىق ىستەر قوزعالىپ، تەرگەۋ امالدارى باستالدى، دەپ حابارلايدى Aqshamnews.kz ءتىلشىسى.
پاۆلودار وبلىستىق پوليسيا دەپارتامەنتىنىڭ مالىمەتىنشە، ءاربىر وقيعا جەكە-جەكە قارالىپ جاتىر. تەرگەۋ بارىسىندا جاسوسپىرىمدەردىڭ مۇنداي قادامعا بارۋىنا نە سەبەپ بولعانى جانە وقيعانىڭ بارلىق ءمان-جايى انىقتالۋدا. قايعىلى جاعدايلار ءارتۇرلى ۋاقىتتا تىركەلگەنىمەن، مارقۇمداردىڭ بىر-بىرىمەن بۇرىننان تانىس بولعانى بەلگىلى بولدى.
پاۆلودار وبلىسىنىڭ بالا قۇقىقتارى جونىندەگى وڭىرلىك ۋاكىلى ساۋلە شاكەنيەۆانىڭ ايتۋىنشا، جاسوسپىرىمدەر 2008 جىلى تۋعان، الەۋمەتتىك جاعدايى جاقسى، تولىق وتباسىلاردا تاربيەلەنگەن. ۇل بالا ەكىباستۇز قالاسىنداعى مەكتەپتەردىڭ بىرىندە 11-سىنىپتا وقىعان، ال قىز جەرگىلىكتى كوللەدجدىڭ ءبىرىنشى كۋرس ستۋدەنتى بولعان.
الدىن الا مالىمەتتەرگە سايكەس، ءارقايسىسى ءوز ۇيلەرىندە قايتىس بولعان. ولاردى جاقىن تۋىستارى تاۋىپ العان. ۋاكىلدىڭ ايتۋىنشا، جاسوسپىرىمدەر بۇرىن ءبىر سىنىپتا وقىپ، دوستىق قارىم-قاتىناستا بولعان.
وقۋ ورىندارىندا بۋللينگ دەرەكتەرى تىركەلمەگەن، سونداي-اق ولار پسيحولوگتاردىڭ باقىلاۋىندا بولماعان جانە ارنايى ەسەپتە تۇرماعان. الەۋمەتتىك جەلىلەردە تاراعان اقپاراتقا سايكەس، قىز بالانىڭ ءولىمى ءجاسوسپىرىم ۇلدىڭ قازاسىنان ەكى كۇن وتكەن سوڭ بولعان.
قازىرگى ۋاقىتتا وقيعاعا قاتىستى تەرگەۋ جۇمىستارى جالعاسىپ جاتىر.