قازاقستاندا العاشقى اتوم ەلەكتر ستانسياسىنا اتاۋ بەرۋگە جالپىحالىقتىق كونكۋرس باستالدى،- دەپ حابارلايدى Aqshamnews.kz ءتىلشىسى.
25 قىركۇيەك ساعات 12:00-دە ەلىمىزدە العاشقى اتوم ەلەكتر ستانسياسىنا (اەس) اتاۋ بەرۋ بويىنشا جالپىحالىقتىق كونكۋرس رەسمي تۇردە باستالدى. ساۋالناما eGov Mobile ءموبيلدى قوسىمشاسىندا وتەدى. قاتىسۋ ءۇشىن قوسىمشادا "اەس-كە اتاۋ ۇسىنىڭىز" باننەرىن باسىپ، ءوز نۇسقاڭىزدى جولداۋ جەتكىلىكتى. پايدالانۋشىلارعا كونكۋرستىڭ باستالعانى تۋرالى ارنايى push-حابارلامالار جىبەرىلەدى.
ۇيىمداستىرۋشىلاردىڭ مالىمەتىنشە، باستامانىڭ ماقساتى - بولاشاق ستانسياعا ەلدىڭ تاريحي، مادەني جانە ۇلتتىق ەرەكشەلىگىن بەينەلەيتىن ماعىنالى اتاۋ تاڭداۋ. ازاماتتار قازاق نەمەسە ورىس ءتىلىن تاڭداپ، اتاۋدىڭ ءمانىن قىسقاشا ءتۇسىندىرىپ جازۋى كەرەك. سونىمەن قاتار قاتىسۋشىلار رەسمي قاعيدالارمەن تانىسقانىن راستاۋى قاجەت. ۇسىنىستاردى قابىلداۋ 2025 جىلعى 10 قازان، ساعات 23:59-عا دەيىن جالعاسادى.
كونكۋرس ەرەجەلەرىمەن اتوم ەنەرگياسى جونىندەگى اگەنتتىكتىڭ رەسمي سايتىندا جانە الەۋمەتتىك جەلىلەرىندە تانىسۋعا بولادى.
ۇيىمداستىرۋشىلار بارلىق قازاقستاندىقتى ەنەرگەتيكا سالاسىنىڭ تاريحىنا ۇلەس قوسىپ، ەلىمىزدىڭ العاشقى اەس-نا لايىقتى اتاۋ ۇسىنۋعا شاقىرادى.
ەسكە سالايىق، 11 تامىزدا پرەزيدەنت قاسىم-جومارت توقايەۆ قازاقستانداعى العاشقى اتوم ەلەكتر ستانسياسىنا اتاۋ تابۋ ءۇشىن اشىق كونكۋرس وتكىزۋدى ۇسىنعان بولاتىن. جوباعا ەنەرگەتيكا ءمينيسترى الماسادام ساتقالييەۆ، ونىڭ ورىنباسارى تيمۋر جانتيكين، ءماجىلىس پەن سەنات دەپۋتاتتارى، جۋرناليستەر، جازۋشىلار، عالىمدار جانە بلوگەرلەردەن قۇرالعان كوميسسيا جەتەكشىلىك ەتەدى.