قىتايمەن شەكارادا 3ء-شى تەمىرجول وتكىزۋ پۋنكتىن اشۋ، «باقتى» جانە «قالجات» جاڭا قۇرعاق پورتتارىن سالۋ جوسپارلانىپ وتىر.
ياعني قازاقستان ەۋروپا مەن تاياۋ شىعىس باعىتىندا جۇك تاسىمالداۋعا بەلسەندى تۇردە قولايلى جاعدايلار جاساۋدا. وسى جانە وزگە دە ءىرى جوبالار جايلى شانحايدا ۇيىمداستىرىلعان كورمەدە ايتىلدى، دەپ حابارلايدى Almaty-akshamy.kz.
شانحايعا جۇمىس ساپارى بارىسىندا پرەمەر-مينيستر ءاليحان سمايىلوۆ قىتايدىڭ مەملەكەتتىك كەڭەسىنىڭ پرەمەرى لي سيانمەن كەزدەسۋ وتكىزىپ، وندا ەكى ەل اراسىنداعى ساۋدا-ەكونوميكالىق ىنتىماقتاستىقتىڭ وزەكتى ماسەلەلەرى تالقىلاندى.
«مەملەكەتتەرىمىزدىڭ باسشىلارى قارىم-قاتىناسىمىزدى ودان ءارى دامىتۋدىڭ باسىم مىندەتتەرى مەن باعىتتارىن بەلگىلەدى. ءبىز قازاقستاندىق ارىپتەستەرىمىزبەن وسى جوعارى دەڭگەيدەگى كەلىسىمدەردى ءىس جۇزىندە جۇزەگە اسىرۋ ءۇشىن كۇش-جىگەر جۇمساۋعا دايىنبىز. مۇنداي ىنتىماقتاستىق ءبىزدىڭ حالقىمىزدىڭ ءومىر ءسۇرۋ دەڭگەيىنە وڭ اسەر ەتەدى»، - دەيدى قحر مەملەكەتتىك كەڭەسىنىڭ پرەمەرى لي سيان.
ءاليحان سمايىلوۆ قاتىسۋشى ەل دەلەگاسياسىنىڭ باسشىسى رەتىندە شانحايدا وتكەن قىتايدىڭ 6-شى حالىقارالىق يمپورتتىق كورمەسىنىڭ رەسمي اشىلۋ سالتاناتىنا قاتىسىپ، ءسوز سويلەدى.ۇكىمەت باسشىسى قازىرگى تاڭدا بۇل اۋقىمدى كورمە جىل سايىن الەمنىڭ 130-دان استام ەلىنىڭ وكىلدەرى قاتىساتىن جاھاندىق ىسكەرلىك الاڭعا اينالعانىن اتاپ ءوتىپ، ەكى ەل اراسىنداعىبايلانىستىڭ ارتىپ كەلە جاتقانىنا توقتالدى.
«وتكەن جىلى ءبىزدىڭ ەلدەرىمىزدىڭ اراسىندا تاۋار اينالىمى 24 ملرد دوللاردان اسىپ، رەكوردتىق كورسەتكىشكە جەتتى. وسى جىلدىڭ 9 ايىندا عانا ءوزارا ساۋدا تاعى 20 پروسەنتكە ءوسىپ وتىر. الداعى ۋاقىتتا ءبىز تاۋار اينالىمىن 40 ملردقا جەتكىزۋگە نيەتتىمىز. وسىعان بايلانىستى ءبىز بۇكىل قىتايلىق كاسىپورىنداردى ىنتىماقتاستىقتى كەڭەيتۋگە شاقىرامىز»، - دەيدى ق ر پرەمەر-مينيسترى ءاليحان سمايىلوۆ.
قازىرگى ۋاقىتتا قازاقستان حالىقارالىق ماڭىزى بار كولىك-لوگيستيكالىق توراپقا اينالۋ ءۇشىن ەلەۋلى كۇش-جىگەر جۇمساۋدا. 2014 جىلدان بەرى ليانيۋنگان پورتىندا قىتايلىق سەرىكتەستەرمەن بىرلەسىپ قۇرىلعان لوگيستيكالىق تەرمينال جۇمىس ىستەيدى. 2023 جىلدىڭ مامىر ايىندا سيان قۇرعاق پورتىندا قازاقستاندىق تەرمينالدىڭ قۇرىلىسى باستالدى. ال، ۇلتتىق پاۆيلون شەڭبەرىندە قازاقستان سان ءتۇرلى سالا بويىنشا مۇمكىندىكتەرىن كورسەتتى.
«قىتايدىڭ گەوگرافيالىق جاقىندىعى، لوگيستيكا جاعىنان ىڭعايلى ، سوندىقتان جۇڭگو نارىعى ءبىز ءۇشىن قىزىقتى بولىپ كەلەدى. ونىڭ ۇستىنە وتە جاقسى تۋريستىك باعىت بولىپ كەلەدى. جىل سايىن مىڭداعان تۋريست كەلەدى. ءبىز ءوزىمىزدىڭ تابيعاتىمىزدى، ءونىمىمىزدى كورسەتۋگە دايىنبىز»، - «Arba Wine» ج ش س باسقارما مۇشەسى اسەم تۇسىپبايەۆا.
قازاقستاندىق كوممەرسيالىق ستەندتى ارالاۋ بارىسىندا دەلەگاسيا باسشىلارى وتاندىق كاسىپورىنداردىڭ ونىمدەرىمەن جانە ۇسىنىستارىمەن جان-جاقتى تانىستى. جالپى، سوڭعى 5 جىلدا قىتايدىڭ حالىقارالىق يمپورت كورمەسىنە قازاقستاننان 133 كومپانيا قاتىسىپ، سونىڭ ارقاسىندا قۇنى 260 ملن دوللاردان استام سوماعا ءتيىمدى ەكسپورتتىق كەلىسىمشارتتار جاسالدى.