ازاماتتار پىكىر بىلدىرە الادى.
ق ر مادەنيەت جانە اقپارات مينيسترلىگى قازاقستان رەسپۋبليكاسى ۇكىمەتىنىڭ رەگلامەنتىنە وزگەرىستەر مەن تولىقتىرۋلار ەنگىزەتىن ۇكىمەت قاۋلىسىن ازىرلەدى، دەپ حابارلايدى Almaty-akshamy.kz
اتاپ ايتقاندا، جاڭا وزگەرىس بويىنشا، وتىرىستار ونلاين-ترانسلياسيالاۋدى قامتاماسىز ەتە وتىرىپ اشىق ءارى مەملەكەتتىك تىلدە، قاجەت بولعان جاعدايدا ورىس تىلىندە جۇرگىزىلەدى.
پرەزيدەنتتىڭ نەمەسە پرەمەر-مينيستردىڭ باستاماسى بويىنشا جابىق وتىرىستار وتكىزىلۋى مۇمكىن.
قۇجاتتا قول جەتكىزۋ شەكتەلگەن اقپاراتتى قوسپاعاندا، ۇكىمەتتىڭ اشىق وتىرىسىنىڭ قورىتىندىلارى وتىرىس وتكىزىلگەن كۇننەن باستاپ بەس جۇمىس كۇنىنەن كەشىكتىرىلمەيتىن مەرزىمدە ينتەرنەت-رەسۋرستا ورنالاستىرىلاتىنى جازىلعان.
"ونلاين-ترانسلياسيا جۇرگىزۋ كەزىندە ازاماتتارعا پىكىرلەر قالدىرۋعا مۇمكىندىك بەرىلەدى"، – دەلىنگەن قۇجاتتا.
قاۋلى 2024 جىلعى 4 ساۋىردەن باستاپ كۇشىنە ەنەدى.
قۇجات 20 قاراشاعا دەيىن قوعام بولىپ تالقىلاۋ ءۇشىن اشىق نقا سايتىندا جاريالاندى.