قۇرامىندا قازاقستاندىق ەلەنا رىباكينا ونەر كورسەتكەن «سۇڭقارلار» (Falcons) كومانداسى دۋبايدا (ءباا) World Tennis League-2024 كورمە ءتۋرنيرىنىڭ جەڭىمپازى اتاندى، دەپ حابارلايدى aqshamnews.kz
الەمدىك تەننيس ليگاسىندا «سۇڭقارلار» نامىسىن ە.رىباكينادان باسقا رەسەيلىك اندرەي رۋبليەۆ، كانادالىق دەنيس شاپوۆالوۆ جانە فرانسيالىق كارولين گارسيا قورعادى.
«سۇڭقارلار» فينالدا «حوۋكس» (دجوردان تومپسون، ارينا سوبولەنكو، سۋميت ناگال جانە ميررا اندرەيەۆا) كومانداسىن جەڭدى.
وسى دودادا ە.رىباكينا ءتورت جەكەلەي كەزدەسۋ وتكىزىپ، سونىڭ بىرەۋىندە رۋمىنيالىق سيمونا حالەپتى (6:4) ۇتتى. قالعان ۇشەۋىندە الەمنىڭ 1-راكەتكاسى، بەلارۋستىك ارينا سوبولەنكودان (6:7)، پولشا وكىلى يگا شۆەنتەكتەن (3:6) جانە رەسەيلىك ميررا اندرەيەۆادان (2:6) جەڭىلىس تاپتى.
بۇدان ەكى جىل بۇرىن اتالمىش تۋرنيردە قازاقستاندىق تەننيسشى جەڭىمپاز اتانعان ەدى.
ەندى ەلەنا رىباكينا قازاقستان قۇراماسى ساپىندا 27 جەلتوقسان — 5 قاڭتار ارالىعىندا اۋستراليانىڭ سيدنەي جانە پەرت قالالارىندا وتەتىن United Cup تۋرنيرىندە وينايدى.