ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆتىڭ ايتۋىنشا، 2973 تۇرمىستىق قاتتى قالدىقتار (تقق) پوليگونى تىركەلگەن، ونىڭ ىشىندە تەك 608 پوليگوننىڭ ءتيىستى جوبالىق جانە رۇقسات قۇجاتتارى بار، بۇل جالپى سانىنىڭ 20،4%-ىن عانا قۇرايدى، دەپ حابارلايدى aqshamnews.kz
"اتىراۋ، باتىس قازاقستان، تۇركىستان، سولتۇستىك قازاقستان وبلىستارىنىڭ، سونداي-اق شىمكەنت قالاسىنىڭ وبلىس ورتالىقتارىنداعى پوليگوندار 90%-دان استام تولعان، استانادا – 98%، ال جەزقازعاندا – مۇلدە لىق تولى"، – دەدى ەرلان نىسانبايەۆ.
2023 جىلى ۇكىمەت 100 جاڭا پوليگون سالۋ، 8 قولدانىستاعى پوليگوننىڭ قۋاتتىلىعىن ارتتىرۋ جانە 5 پوليگوندى رەكۋلتيۆاسيالاۋ بويىنشا كەشەندى ءىس-شارالار جوسپارىن بەكىتتى.
الايدا قازىرگى تاڭدا، اكىمدىكتەر تەك 7 پوليگون سالىپ، ىسكە قوستى. 23 پوليگون بويىنشا جوبالىق-سمەتالىق قۇجاتتاما (جسق) دايىندالدى، ال 18 پوليگون بويىنشا قۇجاتتاما ازىرلەنۋ ۇستىندە.
"ال قالعان 52 پوليگون بويىنشا اكىمدىكتەر ەشقانداي جۇمىس جۇرگىزبەگەن. اباي وبلىسى بويىنشا – 22 پوليگون، اقمولا وبلىسى – 4 پوليگون، سولتۇستىك قازاقستان وبلىسى – 8 پوليگون بويىنشا قۇجاتتاردىڭ مەرزىمى ءوتىپ كەتكەن، ال تۇزەتۋ جۇمىستارى مۇلدە جوسپارلانباعان. جالپى العاندا، جاڭا الاڭدار سالىنباي جاتىر، سەبەبى قارجىلاندىرۋ جوق. وسىعان بايلانىستى مينيسترلىك قوقىستى ۋتيليزاسيالاۋدان تۇسەتىن قاراجات ەسەبىنەن پوليگوندار سالۋعا قارجى ءبولۋ ماسەلەسىن قاراستىردى. بۇل 11 وڭىردە جالپى قۇنى 53 ملرد تەڭگە بولاتىن 43 پوليگوندى قارجىلاندىرۋعا مۇمكىندىك بەرەدى"، – دەدى مينيستر.
ونىڭ دەرەگىنشە، ەلدە جىل سايىن 4،5 ميلليون توننادان استام كوممۋنالدىق قالدىق تۇزىلەدى، ال 2024 جىلى ولاردى وڭدەۋ دەڭگەيى – 25،8% عانا بولعان.