تۋريزم مەن ەكوتۋريزمدى تۇراقتى دامىتۋ باعدارلاماسى اياسىندا الماتىنىڭ تاۋلى بوكتەرىندەگى تابيعاتى اسەم گورەلنيك شاتقالىندا سالىنىپ جاتقان زاماناۋي Arman-köpir دەپ اتالاتىن جاياۋ جۇرگىنشىلەر كوپىرىنىڭ قۇرىلىسى اياقتالۋعا جاقىن. نىسان جوسپار بويىنشا بيىل قىركۇيەك ايىندا پايدالانۋعا بەرىلەدى.
ۇزىندىعى 77 مەتر بولاتىن كوپىر شاتقالدىڭ ەكى جاعىن قوسىپ، بولاشاقتا اشىلاتىن وقۋشىلارعا ارنالعان «مىڭ بالا» سپورت كلۋبىنا قولجەتىمدىلىكتى قامتاماسىز ەتەدى. كوپىردىڭ قۇرىلىسى جەر بەدەرىنىڭ كۇردەلىلىگىن ەسكەرە وتىرىپ جاسالعان، ونىڭ بەرىكتىگى مەن سەنىمدىلىگى جوعارى، حالىقارالىق قاۋىپسىزدىك جانە پايدالانۋ ستاندارتتارىنا ساي كەلەدى. جوبا جەكەمەنشىك كومپانيا باستاماسىمەن، ەۋروپانىڭ تاۋلى جانە قورعالاتىن ايماقتارىندا اسپالى كوپىر سالۋدا كوپجىلدىق تاجىريبەسى بار شۆەيساريانىڭ Swissrope Ltd كومپانياسىمەن بىرلەسە جۇزەگە اسىرىلىپ وتىر.
كوپىرگە جاقىن ماڭدا 912 م² اۋماقتى قامتيتىن كوپفۋنكسيونالدى سپورت زالى مەن بالالارعا، سپورتتىق توپتارعا جانە وقۋ-جاتتىعۋ جيىندارىنا قاتىسۋشىلارعا ارنالعان جايلى 12 ءمودۋلدى كاپسۋلا پايدا بولادى. جاڭا كەشەن جىل بويى بەلسەندى دەمالىس، سپورتتىق جاتتىعۋلار مەن تابيعات اياسىنداعى ءبىلىم بەرۋ باعدارلامالارى ءۇشىن الاڭعا اينالادى.
ەسكە سالا كەتەيىك، بيىل كوكتەمدە گورەلنيك اۋماعىندا ۆيزيت ورتالىققا اپاراتىن «جۇمباق جول» جاياۋ جۇرگىنشىلەر جولى اشىلعان ەدى. ۇزىندىعى 285 مەتر بولاتىن سوقپاق جول ارقىلى دەمالىس ايماقتارىنا بارۋعا بولادى، تۇنگى جارىق جانە اقپاراتتىق ستەندتەر بار. جوبا ەكوتۋريزمدى دامىتۋعا جانە مەدەۋ مەن شىمبۇلاق سياقتى تانىمال باعىتتارعا تۇسەتىن رەكرەاسيالىق جۇكتەمەنى ازايتۋعا باعىتتالعان.
بۇل باستامالاردى جۇزەگە اسىرۋ جايلى ءارى ءقاۋىپسىز تۋريستىك ورتا قۇرۋعا، بەلسەندى جانە تانىمدىق دەمالىس مۇمكىندىكتەرىن كەڭەيتۋگە، سونداي-اق تابيعي مۇرانى ساقتاۋعا ىقپال ەتەدى.