قازاقستاندا وتاندىق فارماسيەۆتيكا ۇلەسىن ارتتىرۋ ماقساتىندا ءتورت جاڭا زاۋىت سالىنادى، دەپ حابارلايدى Aqshamnews.kz ءتىلشىسى.
پرەمەر-مينيستردىڭ رەسمي اقپاراتتىق رەسۋرسىنىڭ مالىمەتىنشە، ۇكىمەت پرەزيدەنت قاسىم-جومارت توقايەۆتىڭ تاپسىرماسىنا سايكەس ءتورت كومپانيامەن جالپى قۇنى 173 ملرد تەڭگە بولاتىن ينۆەستيسيالىق كەلىسىمدەردى ماقۇلداعان. ءتيىستى قاۋلىعا پرەمەر-مينيستر ولجاس بەكتەنوۆ قول قويدى.
جوبالار اياسىندا 356 اتاۋلى دارى-دارمەك، ونىڭ ىشىندە الەۋمەتتىك ماڭىزى بار پرەپاراتتار وندىرىلەدى. ولار ونكولوگيالىق، ەندوكريندىك اۋرۋلارعا ارنالعان دارىلەردى، سونداي-اق ۆيرۋسقا قارسى، يممۋنوبيولوگيالىق جانە قابىنۋعا قارسى مەديسينالىق قۇرالداردى قامتيدى.
فارماسيەۆتيكالىق زاۋىتتار الماتى قالاسىندا (ەكى زاۋىت)، تۇركىستان جانە الماتى وبلىستارىندا بوي كوتەرەدى. ينۆەستجوبالار ناتيجەسىندە 675 جاڭا جۇمىس ورنى اشىلادى.
جاڭا وندىرىستەر ىسكە قوسىلعان سوڭ، ەلدىڭ دارى-دارمەككە يمپورتقا تاۋەلدىلىگى تومەندەپ، وتاندىق مەديسينالىق ونىمدەردىڭ قولجەتىمدىلىگى ارتادى.