ەكس-جايدارمانشى ايبەك باينازاروۆ بەيتانىس قىزعا جاساعان ورىنسىز ارەكەتىن ءازىل رەتىندە بايانداپ، قوعام نارازىلىعىن تۋدىردى، دەپ حابارلايدى Aqshamnews.kz ءتىلشىسى.
ول بۇل وقيعا تۋرالى ازىلكەش دارحان وسپانوۆ جۇرگىزەتىن «شاي اڭگىمە» YouTube شوۋىندا ايتىپ بەرگەن. ايتۋىنشا، جاس كەزىندە پويىزدا ماس كۇيدە بەيتانىس بويجەتكەنگە تيىسكەن. سۇحباتتىڭ ءۇزىندىسى كەيىن Threads الەۋمەتتىك جەلىسىندە تارادى.
جەلى قولدانۋشىلارىنىڭ ايتۋىنشا، ايبەك باينازاروۆ بولعان جاعدايدى وكىنىشپەن ەمەس، كەرىسىنشە ازىلگە اينالدىرىپ جەتكىزگەن. ستۋدياداعى جۇرگىزۋشى مەن قوناقتاردىڭ دا اڭگىمەنى توقتاتپاي، كۇلكىمەن قابىلداۋى كوپشىلىكتىڭ نارازىلىعىن كۇشەيتتى.
بەينەجازبا الەۋمەتتىك جەلىدە كەڭىنەن تالقىلانىپ، رەزونانس تۋدىردى. قولدانۋشىلار ايبەك باينازاروۆتىڭ ءسوزىن دە، ونى توقتاتپاعان جۇرگىزۋشى دارحان وسپانوۆتى دا سىنعا الدى. كوپشىلىك مۇنداي اڭگىمەلەردىڭ زورلىق-زومبىلىق پەن حاراسسمەنتتى قالىپتى جاعداي رەتىندە كورسەتۋى ءقاۋىپتى ەكەنىن اتاپ ءوتتى.
ايەلدەر قاۋىمى پويىزدار مەن قوعامدىق ورىنداردا ورىن العان وسىنداي وقيعالاردان العان پسيحولوگيالىق سوققىلارى تۋرالى پىكىرلەرىن بولىسە باستادى.
وسىدان كەيىن دارحان وسپانوۆ ءتۇسىرىلىم مەن مونتاج بارىسىندا اڭگىمەنىڭ اۋىر كونتەكستىنە ءمان بەرمەي قالعانىن ايتىپ، كەشىرىم سۇرادى. الايدا بۇل مالىمدەمە جەلى قولدانۋشىلارىنىڭ اشۋىن باسا المادى. كوپ ۇزاماي «شاي اڭگىمە» باعدارلاماسىنىڭ اتالعان شىعارىلىمى YouTube پلاتفورماسىنان ءوشىرىلدى.
ەسكە سالايىق، 2018 جىلى «تالگو» پويىزىندا بولعان زورلىق وقيعاسى قازاقستان قوعامىندا ۇلكەن رەزونانس تۋدىرعان ەدى.