جىل باسىندا ەلىمىزدە قاڭتار وقيعاسى، قارالى قاڭتار دەپ ورىن العان الەۋمەتتىك-ساياسي داعدارىستان كەيىن تالاي شىندىقتىڭ بەتى اشىلىپ، قوعامدا بەلگىلى ءبىر دارەجەدە سەرپىلىس بولعانى راس. شىندىق پەن اقيقاتتىڭ، جاقسىلىق پەن جاماندىقتىڭ ارا جىگىن اشىپ، وسى ءبىر كەلەڭسىز دۇربەلەڭگە الىپ كەلگەن قانداي جاعدايات ەكەنىن ۋاقىت ەنشىسىنە قالدىرا تۇرىپ، ەندىگى جەردە ەلىمىزدىڭ ەرتەڭى قالاي، قاي باعىتتا داميدى، توقىراۋ زامانىنىڭ جاعىمسىز اسەرلەرىنەن قالاي ارىلامىز دەگەن ساۋال بۇگىندە ءاربىر قازاقتى، ءاربىر قازاقستاندىقتى تولعاندىرادى دەپ ويلايمىن.
پرەزيدەنت قاسىم-جومارت كەمەل ۇلى توقايەۆتىڭ جاڭا قازاقستان قۇرۋ تۋرالى باستاماسى دەر كەزىندە كوتەرىلگەن تاريحي تاپسىرمالار مەن جوسپارلار دەپ ايتۋعا بولادى. 30 جىل بويى قاراپايىم حالىقتىڭ كوكەيكەستى ارمان-مۇدەسى بولىپ كەلگەن ەڭ وزەكتى ماسەلەلەر مەن وكىنىشتى جاعدايلار اشىق ايتىلدى. بايلار مەن كەدەيلەردىڭ اراجىگى تىم الشاقتاپ كەتكەنى، جەڭ ۇشىنان جالعاسقان پاراقورلىق، جەلدەي ەسكەن جاعىمپازدىق، الەۋمەتتىك تەڭسىزدىك، ت.ب. وزەكتى ماسەلەلەردى دۇرىس شەشۋ پرەزيدەنتتىڭ تاپسىرماسىندا تولىق قامتىلعان ەكەن. ەندىگى جەردە قاراپايىم حالىقتىڭ اراسىنان شىققان بەلسەندى ازاماتتار، ساياسي كوش باسشىلار، زيالى قاۋىم وكىلدەرى پرەزيدەنتتىڭ ماڭايىنا توپتاسىپ، بىرلەسە جۇمىس اتقارعاندارى ابزال. پرەزيدەنتكە سەنە دە ءبىلۋىمىز كەرەك. سەنىم ارتا ءبىلۋىمىز دە اۋاداي قاجەت-اق. الەمدەگى ورىن الىپ جاتقان ءتۇرلى ساياسي ويىندارعا، قاقتىعىستارعا دۇرىس باعا بەرە وتىرىپ، تىكەلەي ارلاسپاي، بەيتاراپ باعىت ۇستانۋ ابزال بولار ەدى...
ەلىمىزدىڭ ىرگەسى شايقالىپ، بولاشاعىمىز بۇلىڭعىر كۇيگە تۇسكەن سىن ساعاتتا پرەزيدەنت توقايەۆ دەر كەزىندە دۇرىس شەشىم قابىلداپ، حالقىنا ادال، تاباندى، باتىل باسشى ەكەنىن كورسەتە ءبىلدى. ءبىر ءقاۋىپتى كەزەڭنەن حالقىمىز امان قالدى. بۇدان بىلاي قولداعى جەتىستىكتەرىمىزدى قادىرلەپ، وتكەننەن ساباق الىپ، پرەزيدەنت ماڭىنا توپتاسىپ، ەل بولاشاعىنىڭ جارقىن بولۋى جولىندا ناقتى يگىلىكتى ىستەر اتقاراتىن كەز كەلگەن سياقتى. وتكەن جىلداردا جىبەرىلگەن ولقىلىقتاردى تولتىرۋ جولىندا ءارقايسىمىز ايانباي ەڭبەكتەنىپ، ءار قازاق ءوز ۇلتى ءۇشىن پايدالى ءىس-شارالاردىڭ جۇزەگە اسۋىنا ۇلەس قوسۋىمىز كەرەك.
بىرىنشىدەن، بۇرىنعىداي كوزبوياۋشىلىق، اسىرەسە، ماقتاۋ مەن جاعىمپازدىق، جەمقورلىق، جەرشىلدىك، ت.ب. جاعىمسىز تۇككە تۇرعىسىز نارسەلەردەن ءبىرجولاتا ارىلۋىمىز قاجەت-اق. ناعىز شىنشىل، باتىل، ءادىل شەشىم قابىلدايتىن ەل تىزگىنىن ۇستانعان بەلسەندى ازاماتتار توبىن قالىپتاستىرۋ كەرەك. سوندا عانا ءبىز الەمدەگى وركەنيەتتى ەلدەر ساپىنا قوسىلامىز.
سان عاسىرلارعا تامىرى جايىلعان ، ۇلى دالا توسىندە ءىزى سايراپ جاتقان كەشەگى كوشپەندى تايپالار مەن ۇلىستاردىڭ جيىنتىعىنان قۇرالعان قازاق حالقىنىڭ بولاشاعى وتە زور دەپ ويلايمىن. ەۋرازيا قۇرلىعىندا ورنالاسقان قازاقستان رەسپۋبليكاسى، بىلە بىلسەك، بەرىسى كەشەگى قازاق حاندىعىنىڭ زاڭدى مۇراگەرى ەكەنىن ءاربىر قازاق ماقتان ەتۋىمىز قاجەت. سوندا عانا وتكەنىمىز بەن بۇگىنگى تاريحىمىزدى سارالاپ، تالداۋ جاساۋ، اسىرەسە، جاس ۇرپاق تاربيەسى ءۇشىن ماڭىزدى بولارىنا ءسوز جوق. ولاي بولسا، اينالايىن جاستار، زامانداستار، التىن بەسىك - قازاق ەلىنىڭ تاۋەلسىزدىگى مەن تىنىشتىعىن قادىرلەي بىلەيىك، قورعاي بىلەيىك دەگىم كەلەدى. ەلدىڭ بىرلىگى – ەرتەڭىمىزدىڭ باياندى بولۋىنىڭ كەپىلى.