2025 جىلعى 20 جەلتوقساندا باس رەداكتورلار كلۋبى قوعامدىق بىرلەستىگى، ءال-فارابي اتىنداعى قازاق ۇلتتىق ۋنيۆەرسيتەتى جانە «Alatau Aqparat» مەدياحولدينگىنىڭ ۇيىمداستىرۋىمەن «سيفرلاندىرۋ داۋىرىندەگى ماسس-مەديا ترانسفورماسياسى» تاقىرىبىندا عىلىمي-پراكتيكالىق دوڭگەلەك ۇستەل ءوتتى، - دەپ حابارلايدى Aqshamnews.kz.
دوڭگەلەك ۇستەلگە باس رەداكتورلار كلۋبىنىڭ مۇشەلەرى - رەسپۋبليكالىق جانە وڭىرلىك بۇقارالىق اقپارات قۇرالدارىنىڭ باسشىلارى، سالا ارداگەرلەرى، ۋنيۆەرسيتەتتىڭ پروفەسسور-وقىتۋشىلار قۇرامى، عالىمدار مەن مەديا ساراپشىلار قاتىستى. كەزدەسۋدە سيفرلىق تەحنولوگيالاردىڭ دامۋى جاعدايىنداعى وتاندىق ماسس-مەديانىڭ ترانسفورماسياسى، قازىرگى جۋرناليستيكانىڭ جاڭا باعىتتارى، مەديا ەتيكا ماسەلەلەرى جانە جاساندى ينتەللەكتتىڭ اقپاراتتىق كەڭىستىككە ىقپالى كەڭىنەن تالقىلاندى.
ءىس-شارانىڭ اشىلۋىندا ق ر پارلامەنتى سەناتىنىڭ دەپۋتاتى، ق ر پرەزيدەنتى جانىنداعى ۇلتتىق قۇرىلتاي ءتوراعاسىنىڭ ورىنباسارى، «باس رەداكتورلار كلۋبى» قب پرەزيدەنتى بيبىگۇل جەكسەنباي جانە ءال-فارابي اتىنداعى قازاق ۇلتتىق ۋنيۆەرسيتەتى باسقارما ءتوراعاسى – رەكتورى جانسەيىت تۇيمەبايەۆ ءسوز سويلەدى.
«باس رەداكتورلار كلۋبى» قب پرەزيدەنتى بيبىگۇل جەكسەنباي ماسس-مەديانىڭ قوعامداعى رولىنە توقتالىپ، سيفرلاندىرۋ داۋىرىندەگى اقپاراتتىق جاۋاپكەرشىلىكتىڭ ماڭىزىن اتاپ ءوتتى: «ماسس-مەديا - ۇلتتىق سانانىڭ ايناسى. سيفرلاندىرۋ داۋىرىندە اقپاراتتى شەكتەۋ ەمەس، وعان جاۋاپكەرشىلىك ورناتۋ ماڭىزدى. مەملەكەت باسشىسى ايتقانداي، ادىلەتتى قوعام ادىلەتتى اقپارات كەڭىستىگىنسىز مۇمكىن ەمەس. وسى باعىتتا پارلامەنت، ۇكىمەت، مەديا جانە ازاماتتىق قوعام بىرلەسە ارەكەت ەتۋى ءتيىس»، – دەدى.
قازۇۋ رەكتورى جانسەيىت تۇيمەبايەۆ مەملەكەت باسشىسى قاسىم-جومارت توقايەۆتىڭ قازاقستاندى «جاپپاي سيفرلىق ەلگە» اينالدىرۋ جونىندەگى ستراتەگيالىق ماقساتىنا توقتالىپ، جاساندى ينتەللەكتىنىڭ ماڭىزىن اتاپ ءوتتى. «جۋرناليستيكا فاكۋلتەتىندە ەلىمىزدەگى العاشقى «LG AI MediaLab» زەرتحاناسىنىڭ ىسكە قوسىلۋى - مەديا مەن كوممۋنيكاسيا سالاسىندا جاساندى ينتەللەكتتى قولدانۋعا باعىتتالعان ماڭىزدى قادام»، - دەدى.
«مەديا ەتيكا. سيفرلىق داۋىردەگى ماسس-مەديا ترانسفورماسياسى» تاقىرىبىندا ق ر پارلامەنتى ءماجىلىسىنىڭ دەپۋتاتى مارات ءباشىموۆ بايانداما جاساپ، اقپاراتتىق قاۋىپسىزدىك پەن زاڭ الدىنداعى جاۋاپكەرشىلىك ماسەلەسىنە نازار اۋداردى.
سونىمەن قاتار ZTB media نەگىزىن قالاۋشى مارعۇلان تۇرسىنوۆ قازىرگى جاساندى ينتەللەكت داۋىرىندە سيفرلىق مەديانىڭ دامۋ قارقىنى باسەڭدەگەن جوق ەكەنىن اتاپ ءوتتى. ونىڭ ايتۋىنشا، سيفرلىق مەديا جاڭا فورماتتارعا بەيىمدەلىپ، اۋديتوريامەن جۇمىس ىستەۋدىڭ ءتيىمدى تەتىكتەرىن قالىپتاستىرىپ كەلەدى.
باسپا ءسوز جۋرناليستيكاسىنىڭ بولاشاعىنا قاتىستى «پروستور» جۋرنالىنىڭ باس رەداكتورى فارحات تامەنداروۆ پەن «اق جەلكەن» بالالار جۋرنالىنىڭ باس رەداكتورى بالجان مۇرات قىزى الاڭداۋشىلىق ءبىلدىردى. ولار وقىرمان مادەنيەتىن، سونىڭ ىشىندە بالالار مەن جاسوسپىرىمدەردىڭ گازەت-جۋرنال وقۋ ادەبىن ساقتاپ قالۋ ءۇشىن ءبىلىم بەرۋ سالاسىمەن تىعىز ارىپتەستىكتە جۇمىس ىستەۋ قاجەتتىگىن اتاپ ءوتتى. رەداكسيالار بۇل باعىتتا ق ر وقۋ-اعارتۋ مينيسترلىگىمەن بىرلەسكەن جوبالاردى جۇزەگە اسىرۋعا دايىن ەكەندەرىن جەتكىزدى.
دوڭگەلەك ۇستەلدە بەلگىلى مەديامەنەدجەر، قازۇۋ جۋرناليستيكا فاكۋلتەتىنىڭ دوكتورانتى تەلمان بەيسەن جاساندى ينتەللەكت داۋىرىندەگى باسقارۋ مادەنيەتىنە توقتالدى: «جاساندى ينتەللەكت داۋىرىندە كەزكەلگەن مەديا باسشىسى رەداكسيانى جانە جالپى مەديا ۇيىمدى ساۋاتتى ءارى ءتيىمدى باسقارا ءبىلۋى كەرەك. تەحنولوگيا وزگەرۋى مۇمكىن، الايدا باسقارۋشىلىق شەشىمنىڭ ساپاسى مەن رەداكسيالىق جاۋاپكەرشىلىك وزگەرمەيدى»، – دەدى ول.
سونداي-اق جيىندا «باس رەداكتورلار كلۋبى» قب ءبىرىنشى ۆيسە-پرەزيدەنتى، ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى مۇراتبەك توقتاعازين، مەديامەنەدجەر ەرلان بەكحوجين، PR مامانى ايبار ولجاي، رەسپۋبليكالىق «ادىلەت» گازەتىنىڭ ءتوراعاسى قۋانىشبەك بوتابەكوۆ، جاساندى ينتەللەكت زەرتتەۋشىسى مەيىرجان اۋەلحان ۇلى، «دالا مەن قالا» گازەتىنىڭ باس رەداكتورى ريشات اسكەربەك ۇلى جانە وزگە دە ساراپشىلار سالالىق ۇسىنىستارىن ورتاعا سالدى.
اشىق ميكروفون سەسسياسىندا مەديا ەتيكا، سيفرلىق داۋىردەگى ماسس-مەديانىڭ ترانسفورماسياسى، قازىرگى جۋرناليستيكاداعى جاساندى ينتەللەكتتىڭ ءرولى جانە سيفرلىق ورتاداعى اقپاراتتىق جاۋاپكەرشىلىك ماسەلەلەرى تالقىلاندى.
ءىس-شارا بارىسىندا وتاندىق جۋرناليستيكانىڭ دامۋىنا ەلەۋلى ۇلەس قوسقان سالا ارداگەرلەرى - ساعىمباي قوزىبايەۆ، كاكەن حامزين، مارات توقاشبايەۆ جانە نۇرجان مۇحامەدجانوۆا «باس رەداكتورلار كلۋبى» قوعامدىق بىرلەستىگىنىڭ «اقپارات ارداگەرى» توسبەلگىسىمەن ماراپاتتالدى. ماراپاتتاۋ ءراسىمى باس رەداكتورلار كلۋبىنىڭ 15 جىلدىق مەرەيتويى اياسىندا ءوتتى.
جيىن سوڭىندا قاتىسۋشىلار ءال-فارابي اتىنداعى قازاق ۇلتتىق ۋنيۆەرسيتەتىنىڭ يننوۆاسيالىق ورتالىعى - Farabi Hub جۇمىسىمەن تانىستى.