جاڭا جىل مەرەكەسى قارساڭىندا الماتىندا اۋقىمدى مەرەكەلىك بەزەندىرۋ جۇمىستارى جۇرگىزىلدى، - دەپ حابارلايدى Aqshamnews.kz.
قالانىڭ ورتالىق قوعامدىق كەڭىستىكتەرىمەن قاتار شالعاي ورنالاسقان شاعىناۋداندار دا قامتىلىپ، بارلىق اۋداندا ءبىرتۇتاس مەرەكەلىك اتموسفەرا قالىپتاستى.
قالا تۇرعىندارى مەن مەگاپوليس قوناقتارى ءجيى باراتىن ءداستۇرلى نۇكتەلەر اباي الاڭىندا، استانا الاڭىندا، اربات جاياۋ جۇرگىنشىلەر ايماعىندا، پانفيلوۆ كوشەسىندە، 28 گۆاردياشى-پانفيلوۆشىلار اتىنداعى ساياباقتا، «الماتى ارەنا» اۋماعىندا جانە «اتاكەنت» كورمە كەشەنىندە ورنالاسقان. اتالعان الاڭداردا نەگىزگى جاڭا جىلدىق ءىس-شارالار، كونسەرتتەر، جارمەڭكەلەر مەن وتباسىلىق دەمالىس باعدارلامالارى وتەدى.
بيىلعى جاڭا جىل ماۋسىمىندا قالانىڭ مەرەكەلىك كارتاسى كەڭەيتىلىپ، 13 جاڭا لوكاسيا كوركەمدىك بەزەندىرۋدەن ءوتتى. ولاردىڭ قاتارىندا سايران كولى، «گۇلدەر» جانە «Family» ساياباقتارى، گاندي مەن بايسەيىتوۆا سكۆەرلەرى، «اينابۇلاق»، «جاسقانات»، «كوكجيەك» جانە «قۇلاگەر» شاعىناۋداندارى بار. بۇل اۋماقتار جارىق كەسكىندەمەلەرىمەن، گيرلياندالارمەن جانە تاقىرىپتىق شاعىن ساۋلەت نىساندارىمەن بەزەندىرىلىپ، تۇرعىندارعا ءۇيىنىڭ ماڭىندا مەرەكەلىك كوڭىل كۇي سىيلاپ جاتىر.
جاڭا جىلدىق بەزەندىرۋ جۇمىستارى قالانىڭ 38 شاقىرىم كوشەسىن، ونىڭ ىشىندە 12 نەگىزگى داڭعىل مەن ماگيسترالداردى قامتىدى. الماتى حالىقارالىق اۋەجايىنان باستاپ قالانىڭ ورتالىق كوشەلەرىنە دەيىنگى باعىتتا جۇزدەگەن جارىق كرونشتەين مەن گيرلياندا ورناتىلدى. اتاپ ايتقاندا، مايلين كوشەسى، قۇلجا تاس جولى، شىعىس اينالما اۆتوجولى، ءال-فارابي، دوستىق، اباي جانە نازاربايەۆ داڭعىلدارى مەرەكەلىك جارىقپەن كومكەرىلدى.
قالا بويىنشا بارلىعى 21 مۇز ايدىنى بەزەندىرىلدى، 480 شاعىن ساۋلەت نىسانى ورناتىلدى، 2000-نان استام جارىق كرونشتەين پايدالانىلدى، 47 كوپىر مەن جەرۇستى جۇرگىنشىلەر وتكەلى كوركەمدەلدى، سونداي-اق شامامەن 2200 اعاش مەرەكەلىك شامدارمەن بەزەندىرىلدى. الماتىدا 74 جاڭا جىلدىق شىرشا ورناتىلدى، ونىڭ 30-ى مەملەكەتتىك، ال 44ء-ى جەكە مەنشىك شىرشالار.
بيىل جاڭا جىلدىق اشەكەيلەردىڭ ءبىر بولىگى قالپىنا كەلتىرىلىپ، قايتا قولدانىلدى. اتاپ ايتقاندا، 56 شاعىن ساۋلەت نىسانى جاڭارتىلدى، ونىڭ ىشىندە 4 جاڭا جىلدىق شىرشا، 45 مەرەكەلىك اعاش ۇيشىك جانە 7 ءىرى جارىق قۇرىلىمى بار.
قالالىق كەڭىستىكتىڭ كوركەمدىك مازمۇنىنا ەرەكشە نازار اۋدارىلدى. الماتىنىڭ ءار اۋدانىندا ەرتەگى كەيىپكەرلەرىنىڭ جارىق مۇسىندەرى، 2026 جىلدىڭ سيمۆوليكاسىمەن بەزەندىرىلگەن ارت-نىساندار، قار ۇشقىنى، سىيلىق، بۇعى جانە جاڭا جىلدىق شارلار پىشىنىندەگى ساندىك كومپوزيسيالار ورناتىلدى. اتالعان كەسكىندەمەلەر قالا تۇرعىندارى مەن تۋريستەر ءۇشىن تانىمال فوتوايماققا اينالدى.
جاڭا جىلدىق بەزەندىرۋدىڭ ماڭىزدى ەلەمەنتتەرىنىڭ ءبىرى - مەرەكەلىك جارمەڭكە ستيلىندە جاسالعان اعاش ۇيشىكتەر. ولار ساۋدا پاۆيلوندارى، ينتەراكتيۆتى الاڭدار جانە قالالىق دەكور ەلەمەنتتەرى رەتىندە پايدالانىلادى.
مەرەكەلىك كوركەمدەۋدە «تازا قازاقستان» تاقىرىپتىق شاعىن ساۋلەت نىساندارى ەرەكشە ورىن الادى. اتالعان نىساندار الماتى حالىقارالىق اۋەجايىندا جانە الماتى-2 تەمىرجول ۆوكزالىندا ورناتىلعان. ولار جاڭا جىلدىق ديزايندى ەكولوگيالىق مازمۇنمەن ۇيلەستىرە وتىرىپ، قورشاعان ورتانىڭ تازالىعىنا قامقورلىق جاساۋ، تابيعاتقا ۇقىپتى قاراۋ جانە ەكولوگيالىق جاۋاپكەرشىلىك مادەنيەتىن قالىپتاستىرۋ يدەياسىن بىلدىرەدى.
مەرەكەلىك كەزەڭدە بۇل نىساندار قالانىڭ نەگىزگى كولىك توراپتارىن بەزەندىرىپ قانا قويماي، قالا قوناقتارى مەن تۇرعىندارىن دامۋ مەن قازاقستاننىڭ ەكولوگيالىق بولاشاعىنا نازار اۋدارۋعا ىقپال ەتەدى.