بۇل تۋرالى ق ر ينۆەستيسيا جانە ينفروقۇرىلىمدىق مينيسترلىگى ءمالىم ەتتى
كوروناۆيرۋستىق ينفەكسيانىڭ جاڭا «وميكرون» شتامىنىڭ پايدا بولۋىنا جول بەرمەۋ ماقساتىندا قازاقستان رەسپۋبليكاسى اۋماعىندا كوروناۆيرۋستىق ينفەكسيانىڭ پايدا بولۋى مەن تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ شەشىمدەرىنە سايكەس، 2021 جىلدىڭ 3 جەلتوقسانىنان باستاپ ەگيپەتكە اۋە قاتىناسى توقتاتىلدى، دەپ حابارلايدى Almaty-akshamy.kz
قازاقستان مەن ەگيپەت اراسىنداعى اۋە رەيستەرىن نۇر-سۇلتان، الماتى، شىمكەنت، قوستاناي جانە اقتوبە قالالارىنان شارم-ەل-شەيح قالاسىنا "ەير استانا" جانە "SCAT" اۋە كومپانيالارى ورىنداپ كەلدى.
اۋە كومپانيالارىنىڭ اقپاراتى بويىنشا، بۇگىنگى تاڭدا ەگيپەتتە 2800-گە جۋىق قازاقستان ازاماتى بار. ولار 2021 جىلعى جەلتوقساننىڭ 3-10 ارالىعىندا اتالعان اۋە كومپانيالارىنىڭ رەيستەرىمەن ەلگە جەتكىزىلەدى.
ق ر باس مەملەكەتتىك سانيتارلىق دارىگەرىنىڭ 2021 جىلعى 30 قاراشاداعى №51 قاۋلىسىنا سايكەس، ەگيپەتتەن كەلگەن جولاۋشىلار COVID-19-عا قارسى ۆاكسينالاۋدىڭ تولىق كۋرسىنىڭ بار-جوعىنا قاراماستان، ق ر مەملەكەتتىك شەكاراسىن كەسىپ وتكەن ساتتەن باستاپ، مەرزىمى 72 ساعاتتان اسپاعان COVID-19-عا پتر ادىسىمەن تاپسىرىلعان تەستىنىڭ تەرىس ناتيجەسى تۋرالى انىقتامانى كورسەتۋى ءتيىس. سونداي-اق، ۆاكسينا العان جانە ءتيىستى انىقتاماسى بار بولسا دا، 7 كۇنگە وقشاۋلانۋى كەرەك.
رەيستەردىڭ ورىندالاتىن كۇندەرى تۋرالى تولىق اقپارات الۋ ءۇشىن جولاۋشىلار تۋردى نەمەسە اۋە بيلەتىن ساتىپ العان ورىنعا حابارلاسۋى قاجەت.