بۇل تۋرالى ءبىرىڭعاي جيناقتىق زەينەتاقى قورىنىڭ رەسمي سايتى جازدى.
2022 جىلى ءبىرجولعى زەينەتاقى تولەمىن الۋدىڭ جەتكىلىكتىلىك شەگى 1،8 ەسە كوتەرىلەدى، دەپ حابارلايدى Almaty-akshamy.kz
ق ر «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭىندا: «زەينەتاقى جيناقتارىنىڭ ەڭ تومەن جەتكىلىكتىلىگىنىڭ شەگى - قازاقستان رەسپۋبليكاسىنىڭ ۇكىمەتى بەكىتكەن ادىستەمەگە سايكەس ايقىندالعان، رەسپۋبليكالىق بيۋدجەت تۋرالى زاڭدا بەلگىلەنگەن جانە ءتيىستى قارجى جىلىنىڭ 1 قاڭتارىندا قولدانىستا بولاتىن ەڭ تومەن زەينەتاقى مولشەرىنەن كەم ەمەس اي سايىنعى زەينەتاقىنى قامتاماسىز ەتۋ ءۇشىن قاجەتتى مىندەتتى زەينەتاقى جارنالارى جانە (نەمەسە) مىندەتتى كاسىپتىك زەينەتاقى جارنالارى ەسەبىنەن قالىپتاستىرىلعان زەينەتاقى جيناقتارىنىڭ ەڭ تومەن مولشەرى» دەپ ايقىندالعان.
تجش ايقىنداۋ ادىستەمەسى قازاقستان رەسپۋبليكاسى ۇكىمەتىنىڭ 2013 جىلدىڭ 2 قازانىنداعى №1042 قاۋلىسىمەن (2021 جىلدىڭ 6 قاڭتارىنداعى وزگەرىستەرىمەن جانە تولىقتىرۋلارمەن) بەكىتىلگەن.
ادىستەمەگە سايكەس، تجش مولشەرى ءاربىر جاس ەرەكشەلىكتەرى ءۇشىن ەسەپتەلەدى جانە بولاشاق زەينەتاقى تولەمدەرى مەن زەينەتاقى جارنالارىنىڭ ءوسۋىن (يندەكستەلۋىن) ەسكەرەدى. بۇل رەتتە قازاقستان رەسپۋبليكاسىنىڭ «رەسپۋبليكالىق بيۋدجەت تۋرالى» زاڭىنا سايكەس، جىل سايىن يندەكستەلەتىن ەڭ تومەنگى جالاقى (ەتج)، ەڭ تومەنگى زەينەتاقى (ەتز)، ەڭ تومەنگى كۇنكورىس دەڭگەيى (ەتكد) سياقتى الەۋمەتتىك كورسەتكىشتەر قولدانىلادى. وسىعان بايلانىستى تجش مولشەرىن ەسەپتەۋ جىل سايىن اتالعان كورسەتكىشتەردىڭ ءوسۋىن ەسكەرە وتىرىپ جۇرگىزىلەدى.
سونداي-اق، ادىستەمەگە سايكەس تجش انىقتاۋ ءۇشىن قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنىڭ ۇسىنىسى بويىنشا جانە قازاقستان رەسپۋبليكاسى ۇلتتىق ەكونوميكا مينيسترلىگىنىڭ كەلىسىمى بويىنشا جىل سايىنعى نەگىزدە قابىلداناتىن كورسەتكىشتەر پايدالانىلادى.
2022 جىلعا الەۋمەتتىك كورسەتكىشتەر مولشەرى ۇلعايتىلعاندىقتان (اتاپ ايتقاندا، ەتج مولشەرى 2021 جىلى 42 500 تەڭگەدەن 2022 جىلى 60 000 تەڭگەگە دەيىن (نەمەسە 41%) ءوستى)، 2022 جىلعا تجش مولشەرى دە كوبەيتىلدى.
تولىق مالىمەت بجزق سايتىندا بەرىلگەن.