جاھان جۇرتىن تامساندىرعان ديماش قۇدايبەرگەن ونەرى ارقىلى قازاقستاندى الەمگە تانىتىپ قانا قويماي، ەل ەكونوميكاسىنا دا تابىس اكەلىپ وتىر - ەكونوميست، قارجىگەرلەر.
ءانشىنىڭ الماتىداعى شوۋ كونسەرتىنە 6 مىڭنان استام شەتەلدىك مەيمان كەلگەن. ولار الىپ شاھاردىڭ اسەم جەرلەرىن ارالاپ، قازاقتىڭ سالت-داستۇرىمەن تانىستى. ەستەلىككە ۇلتتىق ناقىشتاعى كادەسىيلار مەن ءانشى بەينەلەنگەن سىيلىقتار الدى، دەپ حابارلايدى Almaty-akshamy.kz.
نورما چاۆەس - ديماشتىڭ امەريكادان كەلگەن جانكۇيەرى. قازاقستانعا العاش رەت تابان تىرەۋى. "Stranger" كونسەرتىنەن العان اسەردى سوزبەن جەتكىزۋ مۇمكىن ەمەس"، - دەيدى ول. وسى ساياحاتقا باس-اياعى 5 مىڭ دوللار جۇمساعانىن ايتادى.
«ديماشتىڭ كەشىنە افيشا شىققان كەزدە بىردەن كونسەرتتىڭ جانە ۇشاق بيلەتىن ساتىپ الدىم. قوناق ءۇي تاڭدادىم. 20 قىركۇيەكتە الماتىعا كەلدىم. سول ۋاقىتتان بەرى قالانىڭ ءبىراز كورىكتى جەرىن ارالادىم. قارجىمنىڭ كوپ بولىگىن قوناق ءۇي مەن بيلەت شىعىندارىنا جۇمسادىم»، - دەيدى اقش-تان كەلگەن ديماشتىڭ جانكۇيەرى نورما چاۆەس.
بۇل رەتتە، كونسەرت الدىندا قالاداعى 4-5 جۇلدىزدى قوناق ۇيلەردىڭ كوبى لىق تولدى. اۋقىمدى كەشتىڭ ارقاسىندا وسى سالاعا دا ءبىراز كىرىس كەلگەنى جاسىرىن ەمەس.
«Stranger» كونسەرتىنە الەمنىڭ 68 مەملەكەتىنەن 6 مىڭنان استام تۋريست كەلگەن. ولاردىڭ باسىم بولىگى توقتاعان. الماتىداعى 4-5 جۇلدىزدى قوناق ۇيلەردىڭ ورتاشا باعاسى تاۋلىگىنە 40 مىڭ تەڭگەدەن اسادى. كونسەرت بيلەتتەرىنىڭ قۇنى 8 مىڭنان باستالىپ، 40 مىڭعا دەيىن جەتتى. شەتەلدىكتەر شاھاردىڭ كورىكتى جەرلەرىن تاماشالادى. ەكونوميستەردىڭ ەسەبىنشە، الماتىعا ساپارى كەزىندە ءبىر تۋريست كەمى 1 مىڭ دوللار جۇمساپ، قالا بيۋدجەتىن ايتارلىقتاي تولىقتىردى.
«تۋريستەردىڭ ءبىرىنشى كەزەكتە پايدا كەلتىرەتىن سالاسى - ول قوناق ءۇي، قىزمەت كورسەتۋ سالاسى. پاندەميادان كەيىن بۇل سالالار بىزدە قينالىپ قالعان. وسى ديماشتىڭ كونسەرتى سياقتى الەمدىك دارەجەدەگى كونسەرتتەردىڭ ۇيىمداستىرىلۋى بۇل سالاعا قوسىمشا دەم بەرەدى دەپ ايتۋعا نەگىز بار. ديماشتىڭ كونسەرتىنە كەلگەن ازاماتتار دوللارمەن كەلەدى. ولار ەۋرومەن كەلەدى. ونىڭ بىزگە پايداسى دا وتە جوعارى، سەبەبى، شەتەلدەن كوك قاعازدىڭ كەلىپ جاتقانى تەڭگەنىڭ تۇراقتى بولۋىنا بەلگىلى ءبىر دارەجەدە ۇلەسىن بەرەدى دەپ ايتۋعا نەگىز بار»، - دەيدى ەكونوميست ماقسات حالىق.
مۋزىكا، كينو، ديزاين، جارناما، ءسان بيزنەسىنەن ەلگە كەلەتىن تابىستى كرەاتيۆتى ەكونوميكا دەيدى. بۇل سالالاردا قازاقستاندا 285 مىڭ ادام ەڭبەك ەتىپ ءجۇر. ال بەلگىلى ساراپشىلار الەمدى انىمەن تەربەگەن ديماش قۇدايبەرگەندى ۇلتتىق كومپانيالار سياقتى ەكونوميكاعا وراسان زور پايدا اكەلەتىن برەندكە اينالدى دەپ وتىر.