تەاتر كەڭىستىگىندەگى وزىندىك ايرىقشا باعىتى مەن ورنى بولەك الماتى مەملەكەتتىك قۋىرشاق تەاترى 1 قازاندا بولگاريا رەسپۋبليكاسىنىڭ ۆارنا قالاسىندا وتەتىن فەستيۆالگە اتتانادى.
ءۇش جىلدا ءبىر رەت ۇيىمداستىرىلاتىن ەڭ بەدەلدى تەاتر فەستيۆالدەرىنىڭ بىرەگەيى - XVII حالىقارالىق «التىن دەلفين» قۋىرشاق تەاترلار فەستيۆالىندە ونەر كورسەتۋ – ءبىر بەلەس. ويتكەنى، تەاتر ۇجىمى اتالمىش فەستيۆالگە الەمنىڭ 38 ەلىنەن 135 ونەر مەكەمەلەرى ۇسىنعان 160 ءوتىنىم اراسىنان ىرىكتەلىپ وتىر. فەستيۆالدە بولگاريا، يتاليا، جۇڭگو، وڭتۇستىك افريكا، تۇركيا، قازاقستان رەسپۋبليكالارىنان - بارلىعى 14 تەاتر ۇجىمى دوداعا تۇسپەك، دەپ حابارلايدى Almaty-akshamy.kz
XVII حالىقارالىق «التىن دەلفين» قۋىرشاق تەاترلار فەستيۆالىنە الماتى مەملەكەتتىك قۋىرشاق تەاترى الەم دراماتۋرگياسىنىڭ «كورولى» سانالاتىن ۋيليام شەسپيردىڭ ايگىلى «رومەو مەن دجۋلەتتا» تۋىندىسىن قۋىرشاقتار بەينەسىندە ۇسىنباق. شىرعالاڭعا تولى ماحاببات، وشپەندىلىك، ساعىنىش پەن باتىلدىقتى زامانىنا ساي تۇلەتكەن قويىلىمنىڭ رەجيسسەرى – دينا جۇماباي. سۋرەتشىسى – يۋليا چەرنوۆا، بالەتمەيستەرى – اننا سوي، قۋىرشاقتاردى جاساۋشى شەبەرى – نيكولاي پروسكۋرين. سۇلۋلىققا سۇيسىنۋدەن، ادامنىڭ ۇلىلىعىنا دەگەن سەنىمنەن جانە ونىمەن ومىردە قۋانىشتى بولىسۋگە تىرمىسۋىنان تۋىنداعان سپەكتاكل ادام بويىنداعى قاندى كەك پەن قىزعانىشتى، مەنمەنشىلدىك پەن پەندەشىلىك سىندى قاسيەتتەردى جەڭگەن ءمولدىر ماحاببات تۋرالى باياندالادى.
ونەر ۇجىمدارىمەن شىعارماشىلىق بايلانىس ورناتىپ، كاسىبي بىلىكتىلىكتى شىڭداپ، تاجىريبە الماسۋدى نەگىزگى ماقسات سانايتىن الماتى مەملەكەتتىك قۋىرشاق تەاترى اعىمداعى جىلى كونيا، اقتوبە، الماتى، ورال، اقتاۋ قالالارىنداعى حالىقارالىق دەڭگەيدەگى 6 فەستيۆالگە قاتىسىپ، جۇلدەلى ورىندارعا يە بولدى. الداعى ۋاقىتتا شەتەلدىك جانە وتاندىق 4 فەستيۆالگە قاتىسقالى وتىرعانىن دا ايتا كەتكەن ءجون.
تەاتر تالانتتارى تارتىسقا تۇسەتىن الامان بايگەدە وزا شابادى دەگەن سەنىمدەمىز!