دارىگەرلەر ينسۋلت العان ناۋقاستى تىلگە كەلتىردى

ياعني ناۋقاستىڭ سويلەۋ قابىلەتى قالپىنا كەلدى. 

الماتى كوپسالالى كلينيكالىق اۋرۋحاناسىنا سويلەۋ قابىلەتى بۇلشىق ەتتەرىنىڭ (ەرىن، ءتىل، جۇمساق تاڭداي، داۋىس قاتپارلارى، كومەي، تىنىس الۋ بۇلشىقەتتەرى) يننەرۆاسياسى بۇزىلعان 60 جاستاعى ناۋقاس تۇسكەن. تەكسەرۋدەن كەيىن اۋرۋحانا دارىگەرلەرى ناۋقاسقا ينسۋلتتان كەيىنگى ديزارتريا دياگنوزىن، ياعني سويلەۋ قابىلەتىنىڭ بۇزىلعنانى انىقتادى، دەپ حابارلايدى Almaty-akshamy.kz Elorda.info-عا سىلتەمە جاساپ. 

جالپى، سويلەۋ قابىلەتىنىڭ بۇزىلۋ سەبەپتەرى ينسۋلت، باس ميىنىڭ جاراقاتتارى، نەيروحيرۋرگيالىق ارالاسۋلاردىڭ سالدارى، ىسىكتەر جانە ءارتۇرلى نەيرودەگەنەراتيۆتى پروسەستەر بولۋى مۇمكىن.

«ناۋقاستىڭ نەگىزگى اۋرۋ بەلگىلەرى ارتيكۋل مۇشەلەرىنىڭ قوزعالعىشتىعىنىڭ شەكتەلۋى، بۇلىڭعىر، وقىلمايتىن جانە باياۋ سويلەۋ بولدى. ناۋقاستىڭ سويلەۋىن قالپىنا كەلتىرۋ ءۇشىن ءبىز لوگوپەدپەن جۇمىس جاساۋ كەرەكتىگىن بايقادىق. دياگنوستيكالىق تەكسەرۋ بارىسىندا مامان سويلەۋ قابىلەتى بۇزىلۋىنىڭ قانداي اسپەكتىلەرى بويىنشا بولعانىن قاراپ، جەكە قالپىنا كەلتىرۋ باعدارلاماسىن جاسادى جانە لوگوپەديالىق ماسساج، تىنىس الۋ، ارتيكۋلياسيالىق گيمناستيكا، سويلەۋ بۇلشىقەتتەرىن دىرىلدەتۋدى قامتيتىن جەكە ساباقتار وتكىزدى. ناۋقاسقا كورسەتىلگەن بارلىق كومەك مىندەتتى الەۋمەتتىك مەديسينالىق ساقتاندىرۋ اياسىندا جۇرگىزىلدى»، - دەپ ءبولىستى وڭالتۋ ءبولىمىنىڭ مەڭگەرۋشىسى دينارا نامەتوۆا.

قازىرگى كەزدە ناۋقاستىڭ جاعدايى جاقسى، سويلەۋ قابىلەتى ورنىنا كەلىپ، قالىپتى جاعدايداعى ومىرىنە قايتا ورالعان.