ەلوردالىق دارىگەر جرۆي كەزەڭىنە بايلانىستى اتا-انالارعا ۇندەۋ جاسادى، دەپ حابارلايدى aqshamnews.kz
بۇل جىل سايىن قايتالاناتىن تابيعي ەپيدەميولوگيالىق كەزەڭ بولعانىمەن، دارىگەرلەر اتا-انالارعا ساقتىقتى كۇشەيتۋدى ەسكەرتۋدە. №3 كوپبەيىندى قالالىق بالالار اۋرۋحاناسىنىڭ ءبولىم مەڭگەرۋشىسى ابايداحار تالانت ۇلىنىڭ ايتۋىنشا، استاناداعى بارلىق ەمحانادا، ونىڭ ىشىندە بالالارعا ارنالعان فيلترلىك كابينەتتەردە جۇمىستىڭ قارقىنى كۇشەيگەن. كۇنى بويى كەلۋشىلەر لەگى ازايمايدى. دارىگەرلەردىڭ باستى تالابى – ۆيرۋس بەلگىلەرى بايقالعاندا اتا-انالاردىڭ بىردەن فيلترلىك كابينەتكە جۇگىنۋى. سەبەبى العاشقى بەلگىلەردى جەڭىل قابىلداۋ نەمەسە ۇيدە ۇزاق ۋاقىت ەم جاساۋ – اۋرۋدىڭ اسقىنۋىنا اكەلەتىن نەگىزگى فاكتورلاردىڭ ءبىرى.
سونىمەن قاتار اتا-انالار كوبىنە دەنە قىزۋىن تۇسىرەتىن دارىلەردى دۇرىس مولشەرمەن بەرمەيدى. مۇنداي پرەپاراتتار بالانىڭ جاسىنا جانە سالماعىنا سايكەس ەسەپتەلۋى قاجەت. دوزانىڭ كوپ نەمەسە از بولۋى اعزاعا قوسىمشا سالماق تۇسىرەدى. دارىلەر ءار التى ساعات سايىن عانا بەرىلۋى ءتيىس. ال تەمپەراتۋرانى 38،5°-قا جەتكەندە عانا ءتۇسىرۋ كەرەك. ونىڭ الدىندا اعزا ۆيرۋسپەن وزدىگىنەن كۇرەسەدى. تەك تىرىسۋ سيندرومى بار بالالاردا بۇل كورسەتكىش 37،5°-تان اسپاۋى ءتيىس – بۇل توپتاعى بالالار ەرەكشە باقىلاۋدى قاجەت ەتەدى.
ءاربىر اتا-انا ماۋسىمدىق ۆيرۋسقا سالعىرت قاراماي، العاشقى بەلگىدەن باستاپ دۇرىس ارەكەت ەتسە، اۋرۋدىڭ اۋىر تۇرلەرىنە جول بەرمەۋگە بولادى.
دارىگەرلەردىڭ ايتۋىنشا، جاۋاپتى ءارى ۋاقىتىلى قادام – ءار وتباسىنىڭ قاۋىپسىزدىگىن قامتاماسىز ەتەتىن باستى شارت.