الماتى اكىمى دارحان ساتىبالدى جۇمىس ساپارى بارىسىندا قالانىڭ ءبىرقاتار ماڭىزدى نىسانىن ارالاپ، جوندەۋ جانە جوبالاۋ جۇمىستارىنىڭ جاي-كۇيىمەن تانىستى. سونىمەن قاتار ول قالالىق ينفراقۇرىلىم مەن قوعامدىق كەڭىستىكتەردى دامىتۋدىڭ باسىم باعىتتارىن تالقىلادى.
جۇمىس ساپارى اۋەزوۆ اۋدانى اكىمدىگىنىڭ اپپاراتىنان باستالدى. قازىرگى ۋاقىتتا بۇل جەردە اكىمشىلىك عيماراتقا كۇردەلى جوندەۋ جۇرگىزىلىپ جاتىر. نىساندى ارالاۋ كەزىندە اكىمگە قۇرىلىس-مونتاج جانە ينجەنەرلىك جۇمىستاردىڭ ورىندالۋ كەزەڭى، بەلگىلەنگەن مەرزىمنىڭ ساقتالۋى مەن اتقارىلىپ جاتقان جۇمىستاردىڭ ساپاسى تۋرالى اقپارات بەرىلدى. عيماراتتىڭ ىشكى جوسپارلانۋىن جەتىلدىرۋگە، ينجەنەرلىك جەلىلەردى جاڭارتۋعا، قىزمەتكەرلەر مەن كەلۋشىلەر ءۇشىن قولايلى جاعداي جاساۋعا، سونداي-اق مۇمكىندىگى شەكتەۋلى ازاماتتارعا قولجەتىمدى ورتا قالىپتاستىرۋعا ەرەكشە ءمان بەرىلدى.
بۇدان كەيىن قالا اكىمى ن. ساس اتىنداعى بالالار مەن جاسوسپىرىمدەر تەاترىنىڭ قايتا جاڭعىرتۋ جۇمىستارىنىڭ بارىسىمەن تانىستى. قاراۋ بارىسىندا عيماراتتىڭ فۋنكسيونالدىق مۇمكىندىكتەرى مەن ساۋلەتتىك ەرەكشەلىكتەرىن ساقتاۋعا باعىتتالعان قۇرىلىس-مونتاج جۇمىستارى مەن تەحنيكالىق شەشىمدەر تالقىلاندى. قايتا جاڭعىرتۋ جۇمىستارىنا جۇيەلى باقىلاۋ جۇرگىزىپ، ورىندالاتىن جۇمىستىڭ ساپاسىنا قويىلاتىن تالاپتاردىڭ قاتاڭ ساقتالۋىن قامتاماسىز ەتۋ جونىندە ناقتى تاپسىرمالار بەرىلدى.
جۇمىس ساپارى سايران كولى ماڭىنداعى اۋماق پەن ۇلكەن الماتى وزەنى ارناسىنا ىرگەلەس جاتقان ۋچاسكەنى ارالاۋمەن اياقتالدى. كوشپەلى تالقىلاۋ بارىسىندا اۋماقتىڭ قازىرگى جاعدايى زەردەلەندى. قالا اكىمى بۇل اۋماقتى دامىتۋدا كەشەندى ءتاسىلدىڭ قاجەتتىگىن اتادى. اتاپ ايتقاندا، جوسپارلاۋ شەشىمدەرىن بىرىزدەندىرۋ، قوعامدىق كەڭىستىكتىڭ ءبىرتۇتاس ءارى لوگيكالىق قۇرىلىمىن قالىپتاستىرۋ، سونداي-اق تۇرعىنداردىڭ قاۋىپسىزدىگى مەن جايلىلىعىن قامتاماسىز ەتۋ قاجەتتىگىنە نازار اۋدارىلدى.