شىمكەنت قالاسىنداعى مەديسينالىق مەكەمەلەردىڭ بىرىندە مەرزىمدى اسكەري قىزمەتتەگى سارباز كەنەتتەن كوز جۇمدى، دەپ حابارلايدى Aqshamnews.kz ءتىلشىسى.
ۇلتتىق ۇلاننىڭ باسپا ءسوز قىزمەتىنىڭ مالىمەتىنشە، جاس جىگىتتىڭ جۇرەگى توقتاپ قالعان. مارقۇم جامبىل وبلىسى، تاراز قالاسىنان اسكەر قاتارىنا شاقىرىلعان. قىزمەت بارىسىندا ول دەنساۋلىعىنا بايلانىستى بىرنەشە مارتە دارىگەرلەر كومەگىنە جۇگىنگەن.
سارباز شىمكەنت قالاسىنداعى اۋرۋحانالاردا مامانداردىڭ تۇراقتى باقىلاۋىندا بولىپ، قاجەتتى مەديسينالىق تەكسەرۋلەردەن وتكەن. الايدا 2026 جىلعى 6 قاڭتاردا ونىڭ جۇرەگى كەنەتتەن توقتاپ، دارىگەرلەر جانساقتاۋ شارالارىن جۇرگىزگەنىمەن، ءومىرىن ساقتاپ قالۋ مۇمكىن بولماعان.
الدىن الا مالىمەتتەرگە سايكەس، ءولىمنىڭ ىقتيمال سەبەبى — «ءجىتى لەيكوز» (قان وبىرى). اۋرۋدىڭ كۇرت اسقىنۋى اعزانىڭ جالپى جاعدايىنا كەرى اسەر ەتكەن.
اتالعان دەرەك بويىنشا اسكەري-تەرگەۋ باسقارماسى قىلمىستىق ءىس قوزعادى. قازىرگى تاڭدا وقيعانىڭ ءمان-جايىن انىقتاۋ ءۇشىن تەرگەۋ امالدارى جۇرگىزىلىپ جاتىر.