بۇگىن «AMANAT» پارتياسىنىڭ قالالىق فيليالىندا الماتى اكىمى دارحان ساتىبالدىنىڭ ازاماتتاردى جەكە قابىلداۋى بولدى.
كەزدەسۋدە قالا تۇرعىندارى اباتتاندىرۋ، كولىك ينفراقۇرىلىمى، قوعامدىق قاۋىپسىزدىك، سۋمەن جابدىقتاۋ، تۇرعىن ءۇي قۇرىلىسى جانە اعا بۋىندى قولداۋ ماسەلەلەرىن كوتەردى.
قالا اكىمى مۇنداي قابىلداۋلاردىڭ تۇرعىنداردى تىكەلەي تىڭداپ، ولاردىڭ وتىنىشتەرىنە دەر كەزىندە جاۋاپ بەرۋگە مۇمكىندىك بەرەتىنىن اتاپ ءوتتى:
«ازاماتتار كوتەرىپ وتىرعان ماسەلەلەر – ءاربىر الماتىلىقتىڭ ءومىر ساپاسى مەن قاۋىپسىزدىگىنە قاتىستى. بارلىق وتىنىشتەر باقىلاۋعا الىندى، ءارقايسىسى بويىنشا ناقتى شەشىم قابىلدانادى»، – دەدى دارحان ساتىبالدى.
قابىلداۋ قورىتىندىسى بويىنشا ناقتى شارالار قابىلدانىپ، ءتيىستى تاپسىرمالار بەرىلدى.
اتاپ ايتقاندا، جول قوزعالىسى ەرەجەلەرىن بۇزۋدىڭ الدىن الۋ ماقساتىندا قوسىمشا جول بەلگىلەرى مەن بەينەباقىلاۋ كامەرالارى ورناتىلادى. سونداي-اق تۇرعىن ءۇي كەشەنىنىڭ قۇرىلىسىنىڭ زاڭدىلىعىنا تەكسەرۋ جۇرگىزۋ جوسپارلانعان. ەلەكترمەن جابدىقتاۋ ماسەلەلەرىن زەردەلەۋ ءۇشىن ماماندار جەرگىلىكتى جەردە تەكسەرىس جاسايدى.
ازاماتتاردى جەكە قابىلداۋ «AMANAT» پارتياسىنىڭ قولداۋىمەن تۇراقتى تۇردە وتكىزىلىپ كەلەدى. ماقسات – قالا تۇرعىندارى مەن اتقارۋشى ورگاندار اراسىندا اشىق ديالوگ ورناتىپ، وزەكتى ماسەلەلەردى جەدەل شەشۋ.