الماتى — ەلدەگى ەڭ جاس ءارى قارقىندى دامىپ كەلە جاتقان مەگاپوليس. بۇگىندە قالانىڭ ءاربىر ءۇشىنشى تۇرعىنى – 14 پەن 35 جاس ارالىعىنداعى جاستار. جاس الماتىلىقتاردىڭ جالپى سانى 712،3 مىڭنان اسادى. بۇل جاي عانا ستاتيستيكا ەمەس – جاستار قالانىڭ الەۋمەتتىك، مادەني جانە ەكونوميكالىق ومىرىنە بەلسەندى ارالاسىپ كەلەدى.
سوڭعى ءۇش جىلدا جۇيەلى جاستار ساياساتى اياسىندا الماتىدا جاڭا بۋىنداعى كوميۋنيتي-ورتالىقتاردىڭ كەڭ جەلىسى قۇرىلدى. بۇل – بارلىق اۋدانعا تاراعان، جاستاردى قولداۋعا باعىتتالعان تولىققاندى ينفراقۇرىلىم. مۇندا 14 پەن 35 جاس ارالىعىنداعى ازاماتتار بىلىمگە، كاسىبي دامۋ مەن جۇمىسپەن قامتۋعا، الەۋمەتتىك جانە پسيحولوگيالىق كومەككە قول جەتكىزىپ، بەلسەندى قالالىق قاۋىمداستىقتىڭ ءبىر بولىگىنە اينالۋدا.
جاستارعا ارنالعان جۇيەلى قولداۋدىڭ ماڭىزدى بولىگى – الماتى قالالىق مانساپ ورتالىعى. مۇندا ۋنيۆەرسيتەتتەر مەن جۇمىس بەرۋشىلەر ءبىر الاڭدا بىرىكتىرىلگەن. 2025 جىلدىڭ باسىنان بەرى بۇل ورتالىق ارقىلى 4 مىڭنان استام جاس مامان جۇمىسقا ورنالاستى.
كوميۋنيتي-ورتالىقتار – جاڭا فورماتتاعى كەڭىستىك.
قازىرگى ۋاقىتتا الماتىدا 11 كوميۋنيتي-ورتالىق جۇمىس ىستەيدى. بۇل – تەك كوۆوركينگتەر عانا ەمەس، جاستار ءۇشىن اشىق ءارى ءقاۋىپسىز كەڭىستىك. مۇندا پسيحولوگيالىق جانە قۇقىقتىق كومەك الۋعا، كاسىبي باعدارلاۋدان وتۋگە، شەبەرلىك ساباقتارىنا، ينتەللەكتۋالدى ويىندارعا قاتىسۋعا بولادى.
2025 جىلدىڭ باسىنان بەرى:
6،2 مىڭنان استام ادام جۇمىسپەن قامتۋ بويىنشا كەڭەس العان؛
3،9 مىڭ جاس ناقتى جۇمىسقا ورنالاسقان؛
1 مىڭنان استام جاس پسيحولوگيالىق كومەك العان؛
1،3 مىڭنان استام قۇقىقتىق كەڭەس بەرىلگەن.
ورتالىقتاردا كەشەندى ءتاسىل قولدانىلۋدا: جاستاردى باستاپقى دياگنوستيكادان وتكىزۋ، جەكە دامۋ مارشرۋتتارىن قۇرۋ، وقىتۋ، مەنتورلىق جانە ءارى قاراي جۇمىسقا ورنالاستىرۋ.
كوميۋنيتي-ورتالىقتاردا وتكىزىلگەن 1،6 مىڭنان استام ءىس-شارا 380 مىڭنان استام ادامدى قامتىدى. الەۋمەتتىك جەلىلەردەگى (Instagram، TikTok، Telegram ت.ب.) ونلاين-قامتۋ 1،5 ميلليوننان استى. جاستار ەكولوگيالىق، مادەني، ءبىلىم بەرۋ جانە ۆولونتەرلىك جوبالارعا بەلسەندى قاتىسۋدا. ءار ورتالىق ءوز اۋدانىنىڭ رۋحىنا ساي كوميۋنيتي قالىپتاستىرۋدا.
NEET-ساناتىنا جاتاتىن جاستارعا ەرەكشە كوڭىل بولىنەدى. بۇل – جۇمىس ىستەمەيتىن، وقىمايتىن جانە وقۋعا تارتىلماعان جاستار. الماتىدا بۇل توپپەن دە جۇيەلى جۇمىس جۇرگىزىلۋدە.
ءاربىر كوميۋنيتي-ورتالىق ءوز باستامالارىن دامىتادى. ءبىرى بىلىمگە، ءبىرى كاسىپكەرلىككە، ءبىرى شىعارماشىلىققا باعىتتالعان. وسى ارقىلى الماتىداعى ورتالىقتار تەك ينفراقۇرىلىم ەمەس، ناقتى ناتيجەگە جەتەلەيتىن ءتىرى ەكوجۇيەگە اينالدى: مۇندا جاستار قولداۋ تابادى، داميدى، بىرىگەدى، يدەيالارىن جۇزەگە اسىرىپ، قالاداعى وزگەرىستەردىڭ قوزعاۋشى كۇشىنە اينالادى.
بۇل مودەل – بۇگىندە قازاقستان بويىنشا جاستار ساياساتى سالاسىنداعى ەڭ تابىستى جوبالاردىڭ ءبىرى. جىل سوڭىنا دەيىن الماتىدا تاعى ەكى جاڭا ورتالىق اشۋ جوسپارلانىپ وتىر.