الماتىدا جاڭا ستاديون مەن مۇمكىندىگى شەكتەۋلى جاندارعا ارنالعان سپورت ورتالىعى سالىنىپ، «مەدەۋدى» جاڭارتىپ جاتىر
الماتىدا سپورت ينفراقۇرىلىمىن دامىتۋعا باعىتتالعان كەشەندى جوبالار جۇزەگە اسىپ جاتىر. الماتى قالاسى اكىمىنىڭ ورىنباسارى ازامات قالدىبەكوۆ وڭىرلىك كوممۋنيكاسيالار قىزمەتىنىڭ الاڭىندا وسىلاي دەدى.
نۇركەنت شاعىن اۋدانىندا 4 جابىق جانە ءارتۇرلى جابىندىسى بار 10 اشىق كورتى قامتيتىن «الاتاۋ» تەننيس ورتالىعىنىڭ قۇرىلىسى ءبىتتى. رايىمبەك داڭعىلى، 312 مەكەنجايىندا مۇمكىندىگى شەكتەۋلى جاندارعا ارنالعان ارناۋلى سپورت ورتالىعى دا سالىنىپ جاتىر. ونى 2026 جىلى سالىپ بىتپەك.
باستى باسىم باعىتتاردىڭ ءبىرى – FIFA جانە UEFA ستاندارتتارىنا ساي 35 مىڭ ورىندىق جاڭا فۋتبول ستاديونىنىڭ قۇرىلىسى. سونداي-اق، ورتالىق ستاديوندى قايتا جاڭعىرتۋ، تاريحي كەلبەتىن ساقتاي وتىرىپ «مەدەۋ» مۇز ايدىنىن جاڭارتۋ مەنە قالانىڭ ءار اۋدانىندا التى دەنە شىنىقتىرۋ-ساۋىقتىرۋ كەشەنىن سالۋ دا جوسپارلانعان.
بۇل جوبالاردى ىسكە اسىرۋدىڭ باستى ماقساتى – سپورتتىڭ بارشا تۇرعىندار ءۇشىن قولجەتىمدىلىگىن ارتتىرىپ، قازاقستاننىڭ سپورت استاناسى رەتىندەگى الماتىنىڭ مارتەبەسىن نىعايتۋ.
سونىمەن قاتار، الماتىلىق سپورتشىلار رەسپۋبليكالىق جانە حالىقارالىق ارەنالاردا جوعارى ناتيجەلەر كورسەتىپ كەلەدى. 2025 جىلى ولار 4 مىڭنان استام مەدال جەڭىپ الدى: سونىڭ ىشىندە 3 534ء-ى – قازاقستان چەمپيوناتتارىندا، 119-ى – الەم كۋبوگىنىڭ كەزەڭدەرىندە، 298ء-ى – ازيا چەمپيوناتتارىندا جانە 68ء-ى – الەم بىرىنشىلىكتەرىندە. ايرىقشا جەتىستىكتەردىڭ قاتارىندا مانەرلەپ سىرعاناۋدان الەم چەمپيوناتىندا ميحايل شايدوروۆتىڭ كۇمىس جۇلدەسى، سپورتتىق گيمناستيكادان ناريمان كۋربانوۆ پەن ميلاد كاريميدىڭ الەم كۋبوگىنداعى جەڭىستەرى، سونداي-اق جاسوسپىرىمدەر اراسىنداعى شاحماتتان ەكى دۇركىن الەم چەمپيونى اتانعان كسەنيا بالابايەۆانىڭ تابىسى بار.
سونداي-اق، 8 الماتىلىق سپورتشى قازاقستاننىڭ ۇلتتىق قۇراماسى ساپىنا ەنىپ، IX قىسقى ازيا ويىندارىندا 20 مەدال يەلەنۋگە ۇلەس قوستى. الماتىلىقتاردىڭ جەتىستىگى قالانى ەلدەگى سپورتتاعى جەتەكشى ورتالىققا اينالدىرىپ وتىر.