الماتى قالاسىنىڭ اكىمى دارحان ساتىبالدى قالالىق باسقارۋ جۇيەسىندە جانە مەگاپوليستىڭ تىرشىلىگىن قامتاماسىز ەتەتىن نەگىزگى سالالاردا سيفرلاندىرۋدى دامىتۋ جانە جاساندى ينتەللەكت تەحنولوگيالارىن ەنگىزۋ ماسەلەلەرى بويىنشا كەڭەس وتكىزدى.
دارحان ساتىبالدىنىڭ ايتۋىنشا، تالقىلانعان باستامالار مەملەكەت باسشىسى جاريالاعان سيفرلاندىرۋ جانە جاساندى ينتەللەكتتى دامىتۋ جىلى اياسىندا جۇزەگە اسىرىلادى جانە قالانىڭ ءارى تۇرعىنداردىڭ ناقتى قاجەتتىلىگىنە باعىتتالعان قولدانبالى سيپاتتا بولۋعا ءتيىس.
كەڭەس بارىسىندا الماتىنىڭ سيفرلىق ترانسفورماسياسىنىڭ باسىم باعىتتارى قارالدى. ولاردىڭ قاتارىندا تۇرعىندار ءۇشىن ەلەكتروندىق سەرۆيستەردى دامىتۋ، اكىمدىكتىڭ ىشكى ۇدەرىستەرىن سيفرلاندىرۋ، كولىك، تۇرعىن ۇي-كوممۋنالدىق شارۋاشىلىق، ەكولوگيا جانە قوعامدىق قاۋىپسىزدىك سالالارىنا، سونداي-اق ءبىلىم بەرۋ مەن دەنساۋلىق ساقتاۋ جۇيەسىنە زياتكەرلىك شەشىمدەردى ەنگىزۋ ماسەلەلەرى بار.
الماتى اكىمى سيفرلاندىرۋ قالالىق قىزمەتتەردىڭ ساپاسىن ارتتىرۋعا، باسقارۋشىلىق شەشىمدەردىڭ اشىقتىعىن قامتاماسىز ەتۋگە جانە تۇرعىندار ءۇشىن قولايلىلىقتى كۇشەيتۋگە تىكەلەي اسەر ەتۋگە ءتيىس ەكەنىن اتاپ ءوتتى. سونداي-اق دەرەكتەرمەن جۇيەلى جۇمىس جۇرگىزۋ مەن سيفرلىق شەشىمدەردى بەلسەندى ەنگىزۋ وسى ماقساتتارعا قول جەتكىزۋدىڭ نەگىزگى شارتتارى ەكەنى ايتىلدى.
كەڭەس قورىتىندىسى بويىنشا دارحان ساتىبالدى 2026–2030 جىلدارعا ارنالعان Smart City ستراتەگياسى مەن سيفرلىق ترانسفورماسيا جول كارتاسىندا كوزدەلگەن ءىس-شارالاردىڭ ۋاقتىلى ىسكە اسىرىلۋىن قامتاماسىز ەتۋدى، ەلەكتروندىق سەرۆيستەر مەن ازاماتتاردىڭ وتىنىشتەرىن وڭدەۋ جۇيەسىنە جاساندى ينتەللەكت شەشىمدەرىن ەنگىزۋدى جەدەلدەتۋدى، سونداي-اق باستى سالالارداعى سيفرلىق جوبالاردى ىسكە اسىرۋ كەزىندە قالالىق قىزمەتتەر اراسىنداعى ۇيلەستىرۋدى كۇشەيتۋدى تاپسىردى.