عالىم وسى ءوڭىردى مەكەندەيتىن قۇستاردىڭ سانىن انىقتاپ، قاناتتىلارعا قاتىستى زەرتتەۋ دەرەكتەرىن جاڭارتپاق.
«بۋراباي» مەملەكەتتىك ۇلتتىق تابيعي پاركىنە نەمىس ورنيتولوگى يانوش تەوفان جەروم بەكەر (Janosch Théophane Jérôme Becker) كەلدى، دەپ حابارلايدى Almaty-akshamy.kz
قۇستاردى يدەنتيفيكاسيالاۋدا تەرەڭ ءبىلىمى مەن مول تاجىريبەسى بار عالىم قاناتتىلاردىڭ تىنىس-تىرشىلىگىن باقىلاپ، ناقتى مەكەندەيتىن جەرلەرىن كارتاعا ءتۇسىرۋ تاجىريبەسىمەن بولىسەدى. سونداي-اق ول جەرگىلىكتى ورنيتوفاۋنانىڭ ۇلتتىق پارك تىزىلىمىنە قانشالىقتى ساي كەلەتىنىن انىقتايدى.
«بۋراباي» ۇلتتىق پاركى گەرمانيانىڭ اعا ساراپشىلار قىزمەتىمەن 2016 جىلدان بەرى ىنتىماقتاسىپ جۇمىس ىستەپ كەلەدى. وسىعان دەيىن ورمان شارۋاشىلىعى مەن گەرپەتوفاۋنا سالاسىن زەرتتەيتىن ەكى مامان كەلگەن. قۇستاردىڭ پوپۋلياسياسىن زەرتتەۋ ءۇشىن بيىل العاش رەت ورنيتولوگ شاقىردىق. ول ءوزىنىڭ تاجىريبەسىمەن ءبولىسىپ، ءبىز جاساعان قۇستار ءتىزىلىمىنىڭ تولىق ەكەنىنە كوز جەتكىزۋگە ءتيىس»، – دەدى «بۋراباي» مۇتپ اعا عىلىمي قىزمەتكەرى ەۆگەنيي ارحيپوۆ.
بۇگىنگى تاڭدا 129 مىڭ 299 گەكتاردى الىپ جاتقان «بۋراباي» پاركىندە قۇستاردىڭ 197 ءتۇرى بار. سونىڭ ىشىندە 14 ءتۇرى قازاقستاننىڭ قىزىل كىتابىنا ەنگەن. سۇر تىرنا، اققۇيرىق سۋبۇركىت، قاراباس شاعالا مەن شاڭقىلداق قىران سياقتى سيرەك كەزدەسەتىن، جويىلۋدىڭ الدىندا تۇرعان قۇستار دا بار. ماسەلەن، قازاقستان بويىنشا شاڭقىلداق قىراننىڭ 10 جۇبى عانا قالعان.
ۇلتتىق پاركتىڭ ورنيتوفاۋناسى نەگىزىنەن ەۋروپالىق تۇرلەردەن تۇرادى. ۇلكەن تۇركەپتەر، (Streptopelia orientalis)، سۇر شىبىنشى (Muscicapa striata neumanni)، اقباس سۇلىكەش (Emberiza leucocephala) سياقتى سىبىرلىك قۇستار دا كەزدەسەدى. تايگا قۇستارىنان ساڭىراۋقۇر، قارا توقىلداق (Dryocopus martius)، سۋىقتورعاي (Pyrrhula pyrrhula) بار. ساڭىراۋقۇر بۋرابايعا وتكەن عاسىردىڭ الپىسىنشى جىلدارى اكەلىنگەن. سودان بەرى ول وسى ءوڭىردى تەز جەرسىنىپ كەتتى.
ۇلتتىق پارك ماماندارى ەكولوگيالىق جۇيەسىن باقىلاپ، جان-جانۋارلار ءتىزىلىمىن جىل سايىن جاڭارتىپ وتىرادى.