بۇگىن (1938-2014) قازاقستان رەسپۋبليكاسى مەملەكەتتىك تۋىنىڭ اۆتورى، مونۋمەنتشى-سۋرەتشى، قازاقستاننىڭ ەڭبەك سىڭىرگەن مادەنيەت قايراتكەرى شاكەن نيازبەكوۆتىڭ تۋعان كۇنى.
ول تاراز قالاسىندا تۋعان. سانكت-پەتەربۋرگ كوركەم ونەركاسىپ ينستيتۋتىن بىتىرگەن، دەپ حابارلايدى aqshamnews.kz.
ەڭبەك جولى: 1963-1966 جىلدارى سانكت-پەتەربۋرگتەگى ەلەكتر ءپىسىرۋ جابدىقتارىنىڭ بۇكىلوداقتىق عىلىمي-زەرتتەۋ ينستيتۋتىنىڭ سۋرەتشى-كونسترۋكتورى، 1966-1968 جىلدارى قازاق كسر حالىق شارۋاشىلىق جەتىستىكتەرى كورمەسىنىڭ سۋرەتشىسى، 1969-1982 جىلدارى الماتى قالاسىنىڭ باس سۋرەتشىسى، 1982-1987 جىلدارى قازاقستان سۋرەتشىلەر وداعىنىڭ ءتوراعاسى، 1983-1984 جىلدارى كسرو سۋرەتشىلەر وداعىنىڭ حاتشىسى بولىپ قىزمەت ەتتى.
ول – «اباي»، «مۋزىكا سازى»، «اڭشىلىق»، «قۇرمانعازى»، «كىسەن اشقان»، «ءالي باتىر»، «سىرىم داتوۆ» جانە باسقا دا اليۋمينييگە، مىسقا، جەزگە بەدەرلەنگەن مونۋمەنتتىك تۋىندىلاردىڭ، قازاقستان رەسپۋبليكاسى تۋىنىڭ، الماتى قالاسى تاڭباسىنىڭ اۆتورى. تەحنيكا عىلىمىنىڭ دوكتورى ۆ. زايچيكپەن بىرلەسىپ جاساعان پىسىرگىش ماشيناسى مونرەالداعى دۇنيەجۇزىلىك كورمەدە كورسەتىلدى.
«گلوبۋس» تەليەۆيزورىنىڭ كوركەمدىك-كونسترۋكتورلىق ساپاسى ءۇشىن 1965 جىلى چەحوسلوۆاكيادا وتكەن حالىقارالىق كونكۋرستا ءى دارەجەلى سىيلىق بەرىلدى.
«قۇرمەت» وردەنىمەن، 1998 جىلى «استانا» مەدالىمەن، 2001 جىلى «قازاقستان تاۋەلسىزدىگىنە 10 جىل» مەدالىمەن، 2005 جىلى «قازاقستان كونستيتۋتسياسىنا 10 جىل» مەدالى جانە ت.ب مەملەكەتتىك ماراپاتتارمەن ماراپاتتالعان.