قازاقستان ۇلتتىق بانكى مەن ۇلتتىق تولەم كورپوراسياسى بانكارالىق QR تولەمدەرىن ەنگىزۋ بويىنشا پيلوتتىق جوبانى ىسكە قوستى.
ءبىرىنشى ترانزاكسيانىڭ كورسەتىلىمى 15 قاراشادا الماتىدا وتكەن قازاقستان قارجىگەرلەرىنىڭ كونگرەسى اياسىندا ەكىنشى دەڭگەيلى ەكى بانكتىڭ قاتىسۋىمەن ءوتتى، دەپ حابارلايدى aqshamnews.kz.
سونىمەن قاتار بانكارالىق QR تولەم قىزمەتى ازاماتتارعا QR تولەمدەرىن جىلدام جانە ىڭعايلى جۇرگىزۋگە مۇمكىندىك بەرەتىن ۇلتتىق سيفرلىق قارجىلىق ينفراقۇرىلىمنىڭ قۇرامداس بولىكتەرىنىڭ ءبىرى سانالاتىنى اتاپ ءوتىلدى.
«بانكارالىق QR تولەمدەرىن ەنگىزۋ كاسىپكەرلىك سۋبەكتىلەرىنە ءارتۇرلى بانكتەردىڭ بىرنەشە تەرمينالدارىن ورناتۋ قۇنىن تومەندەتۋگە، ال ازاماتتارعا QR-كود ارقىلى ەلدەگى كەز كەلگەن بانكتىڭ تەرمينالى ارقىلى تولەم جاساۋعا مۇمكىندىك بەرەدى. ءوز كەزەگىندە بانكتەر NDFI ينفراقۇرىلىمىنا قاتىسۋ اياسىندا بانكارالىق ترانزاكسيالاردى وڭدەۋ قۇنىن تومەندەتۋ جانە كليەنتتەرگە تولەم قىزمەتتەرىن كەڭەيتۋ ەسەبىنەن شىعىنداردى وڭتايلاندىرۋعا مۇمكىندىك الادى»، دەلىنگەن حابارلامادا.
قازىرگى تاڭدا بانكارالىق QR تولەم جۇيەسىنىڭ فۋنكسيونالدىعى قامتاماسىز ەتىلىپ، قاتىسۋشى بانكتەردى كەزەڭ-كەزەڭىمەن قوسۋ جۇمىستارى جۇرگىزىلىپ جاتىر. جوبانى ماسشتابتاۋ 2025 جىلعا جوسپارلانعان.