15 قاراشا – ۇلتتىق ۆاليۋتا كۇنى جانە قارجى جۇيەسى قىزمەتكەرلەرىنىڭ كاسىبي مەرەكەسى. بۇگىندە ەسەپ-قيساپتىڭ جىلىگىن شاعىپ، مايىن ىشكەن مايتالمان ماماندار جەتەرلىك. سولاردىڭ ءبىرى – ۇلتتىق ۇلاننىڭ الماتىداعى «وڭتۇستىك» وڭىرلىك قولباسشىلىعىنا قاراستى باۋىرجان مومىش ۇلى اتىنداعى 5571 اسكەري بولىمىندە قىزمەت اتقاراتىن قارجى ءبولىمىنىڭ وفيسەرى لەيتەنانت گۇلجان بايمۇحانوۆا.
بۇل سالا الدىمەن مۇقيات بولۋدى تالاپ ەتەدى. ويتكەنى ساندار قاتەلەسكەندى كەشىرمەيدى. ال سول سانداردى «سايراتا» بىلگەن سالا مامانى بۇگىندە ۇلتتىق ۇلاننىڭ ساپىندا ابىرويمەن قىزمەتىن اتقارۋدا.
گۇلجان باعدات قىزى قاراعاندى وبلىسىنىڭ تۋماسى. 2000 جىلدان بەرى الماتى قالاسىندا تۇرادى. الماتى ەكونوميكالىق كوللەدجىن قارجى ماماندىعى بويىنشا، ودان جوعارى وقۋ ورنىن بىتىرگەن. 2009 جىلى قازاق اسكەرىنىڭ الدىڭعى شەبى سانالاتىن ۇلتتىق ۇلان قاتارىنا شاقىرىلادى. سايكەسىنشە اسكەري قىزمەتشىلەرگە قويىلاتىن تالاپ تا، ءتارتىپ تە قارجى مامانىنا قاتار قويىلدى. ناپ-نازىك بولمىسقا يە كەيىپكەرىمىز ويلانباستان ەر ازاماتتارمەن قاتار يىق ءتۇيىستىرىپ، وتان ءۇشىن تيتتەي دە بولسىن قوسقان ۇلەسىم دەپ قىزمەتكە كىرىسەدى. اسكەري جارعىعا باعىنادى. وتان الدىنداعى اسكەري انتتى دا قابىلدايدى.
ونىڭ بۇل سالاعا بەت بۇرۋىنا اناسىنىڭ تىكەلەي قاتىسى بار. ويتكەنى اناسى ۇزاق جىلدار قارجى مامانى بولىپ جۇمىس ىستەدى. ەسىندە، بالا كۇنىندە اناسى تۇنىمەن قات-قات قاعازداردىڭ ورتاسىندا ماي شاممەن، ەسەپشوتتى سارت-سۇرت قاعىپ ۇزاق وتىراتىن.
– وسى ۋاقىتقا دەيىن تۇسىنگەنىم، ادامنىڭ تاعدىرىنا جازىلعانى بولادى ەكەن. قىزىعى، مەنىڭ ارماندار تىزبەگىمدە اسكەري ادام بولۋ مۇلدەم بولماعان. ادەتتە پوگون تاققان، فورما كيگەن جاندارعا كوپشىلىك قىزىعادى عوي. ال، مەنىكى كەرىسىنشە، قىزمەتكە كىرىسكەننەن كەيىن عانا ماماندىعىمدى سۇيە باستادىم. ءيا، باسىندا قىز بالاسى ءۇشىن وڭايعا سوقپادى. ويتكەنى، ەر ازاماتتار سىندى زونت كيىپ، وكوپ قازىپ، قاتال تالاپ پەن تارتىپكە باعىندىق. سودان ەش جامان بولعان جوقپىز، وستىك، وندىك، ۇيرەندىك. وتباسىمىزدا دا، بالا تاربيەسىندە دە وسى جاقتان كورگەن تۇيگەنىمىزدى، ومىرلىك ساباقتارىمىزدى قولدانىپ كەلەمىن، – دەيدى لەيتەنانت گۇلجان بايمۇحانوۆا.
ومىرلىك سەرىگىن دە وسى سالادان جولىقتىردى. سوناۋ 2009 جىلى ۇلتتىق ۇلانعا قابىلدانعان كەزدە قاتارداعى جاۋىنگەر بولدى. سول تۇستا كەلىسىمشارت بويىنشا اسكەري قىزمەتشىلەردى قاداعالايتىن، بىلمەگەنىن ۇيرەتەتىن جاۋاپتى باسشىسى پراپورششيك ەرمەك بايمۇحانوۆ ەدى. سول باسشىسى ءقازىر ادال جار، شاڭىراعانىڭ تىرەگى، ەكى قىزىنىڭ اكەسى. ازاماتى تۇرعاندا گۇلجان ءۇشىن ەش نارسە قيىن ەمەس.