مونەتالار بليستەردە شىعارىلادى.
اقپاراتقا سايكەس، التىن ينۆەستيسيالىق مونەتالاردى كەز كەلگەن ۋاقىتتا جانە الەمنىڭ كەز كەلگەن نۇكتەسىنەن online ساتىپ الۋعا جانە ساتۋعا بولادى، دەپ حابارلايدى aqshamnews.kz
قازاقستان ۇلتتىق بانكى ۇلتتىق ۆاليۋتا – تەڭگە كۇنىنىڭ قۇرمەتىنە وراي 2025 جىلدىڭ I توقسانىندا جاڭا «سيفرلىق ينۆەستيسيالىق مونەتا» جوباسىن ىسكە قوسۋ جوسپارى بار ەكەنىن مالىمدەدى.
«سيفرلىق بالاماداعى ينۆەستيسيالىق مونەتانىڭ قۇنى LBMA (لوندون باعالى مەتالدار نارىعىنا قاتىسۋشىلاردىڭ قاۋىمداستىعى) بەلگىلەگەن التىننىڭ سالماعى مەن باعاسىنا ساي جانە ۇلتتىق بانك بەلگىلەگەن اقش دوللارىنىڭ تەڭگەگە شاققانداعى ايىرباس باعامى نەگىزىندە تەڭگەمەن ەسەپتەلەتىن بولادى»، – دەلىنگەن بانك حابارلاماسىندا.
ايتا كەتسەك، مونەتالار Astana International Exchange (AIX) بيرجاسىنىڭ «TABYS» ءموبيلدى قوسىمشاسى ارقىلى ساتىلادى.
«سيفرلىق ينۆەستيسيالىق مونەتا» جوباسى اياسىندا مونەتالاردى ساتىپ الۋعا، ۇلتتىق بانككە كەرى ساتۋعا، سىيلاۋعا، سونداي-اق ولاردىڭ جەتكىلىكتى سانى جيناقتالعان كەزدە ۇلتتىق بانكتىڭ اۋماقتىق فيليالدارىندا زاتتاي التىن ينۆەستيسيالىق مونەتاعا ايىرباستاۋعا بولادى. وسى جوبا ءۇشىن ارنايى جاڭا ÚKI ينۆەستيسيالىق مونەتاسىنىڭ ەكسكليۋزيۆتى ديزاينى ازىرلەنىپ وتىر. ونىڭ سالماعى 31،1 گرامم، نومينالى 100 تەڭگە، التىن سىناماسى – اu 999،9»، – دەلىنگەن حابارلامادا.
تاعى ءبىر قىزىق جايت، مونەتا «كوشپەندىلەردىڭ عيبادات جانۋارلارى – توتەمدەرى» سەرياسىنداعى كوللەكسيالىق مونەتالار ستيلىندە جاسالعان. ÚKI ينۆەستيسيالىق مونەتاسىن تەك «TABYS» ءموبيلدى قوسىمشاسى ارقىلى ساتىپ الۋعا بولادى.