كەشەگى تارازدا بولعان جارىلىس بۇكىل قازاقستان حالقىنىڭ قابىرعاسىن قايىستىرىپ كەتتى.
ءقازىردىڭ وزىندە 13 ادام قازا تاپقانى جاريا ەتىلدى. قازاقستان تاۋەلسىزدىگىنىڭ 30 جىلدىعى قارساڭىندا مىناداي قايعىلى وقيعالاردىڭ ورىن الۋى جانعا باتادى. وسى 30 جىلدا اسكەري سالادا قانشاما رەفورمالار ورىن الدى. 1993 جىلى قازاقستان قارۋلى كۇشتەرى قۇرىلعاننان باستاپ، 2000 جىلى، 2007 مەن 2017 جىلدارى جاڭا اسكەري دوكترينالار قابىلداندى. مۇنىڭ بارلىعى قازاقستان قارۋلى كۇشتەرىن دامىتۋعا ارنالعان قۇجاتتار. ءبىراق قارۋلى كۇشتەردىڭ قۋاتى بويىنشا قازاقستان الەمدىك رەيتينگتە 140 مەملەكەتتىڭ ىشىندە 62 ورىندى يەلەنىپ وتىر. بۇل اسكەري سالادا ءالى دە ءتۇرلى پروبلەمالار بار ەكەندىگىن كورسەتەدى.
كەزىندە ارىستاعى جارىلىستىڭ ايقايى قانشاما جىلعا سوزىلدى. ەندى كەلىپ تارازدا وسى جاعداي قايتالانىپ وتىر. نەبىر اتپال ازاماتتاردان ايرىلىپ قالدىق. مەنىڭ ويىمشا، مۇنىڭ بارلىعى كادرلىق ماسەلەلەردىڭ كەمشىلىگى مەن جەمقورلىقتىڭ كەسىرىنەن بولىپ وتىر. كەڭەس ۇكىمەتىنىڭ تۇسىندا ءبىر قويما جارىلىپتى دەگەندى ەستىمەپ ەدىك. ءوزىمىز دە اۋعان سوعىسىنا قاتىستىق. ول كەزدە قىشلاقتاردا، تاۋ-تاستاردا قارۋ-جاراقتار ءۇيىلىپ جاتاتىن. سونىڭ بىرەۋى دە جارىلعانىن كورگەن جوقپىز. ويتكەنى، ول كەزدە تەمىردەي ءتارتىپ بولدى. نەگىزى، ءار سالانىڭ ءوزىنىڭ كاسىبي مامانى ءوز جۇمىستارىنا جاۋاپ بەرۋى ءتيىس. بۇل رەتتە، اسىرەسە، اسكەردە كاسىبي بىلىكتىلىكتى كۇشەيتۋىمىز قاجەت. ينجەنەرلىك روتالاردىڭ، بريگادالاردىڭ، باتالونداردىڭ ساپاسىن ارتتىرۋىمىز كەرەك. ەندى ساپاعا كوشەتىن كەز جەتتى.
پرەزيدەنتىمىز وسى ماسەلەگە بايلانىستى ازا تۇتۋ كۇنىن جاريالادى. بەيبىت زاماندا، ويلاماعان جەردەن قازا تاپقان باۋىرلارىمىز يماندى بولسىن! تۋما-تۋىستارىنا، وتباسىلارىنا، بالالارىنا شىن جۇرەكتەن قايعىرىپ كوڭىل ايتامىن. بۇل وزەكتى ورتەيتىن جاعداي. قۇداي ءبىزدى بەيبىت ومىردەن ايىرماسىن. قارۋلى كۇشتەرىمىزدە مۇنداي ماسەلە قايتالانباسىن دەپ تىلەيمىن!