28 قىركۇيەكتە الماتىدا Almaty Marathon وتەدى. «ءبىرىنشى بولۋ – باتىلدىق» كورپوراتيۆتىك قورى ۇيىمداستىرىپ وتىرعان جارىس بيىل ون ءتورتىنشى رەت رەسپۋبليكا الاڭىنان باستالىپ، 60-تان استام ەلدەن كەلگەن 16 مىڭ اتلەتتى بىرىكتىرەدى. وسى جىلى ەكى رەكورد تىركەلدى: 1200-دەن استام شەتەلدىك قوناق قاتىسقالى وتىر، ال 42،2 كم مارافوندىق قاشىقتىققا 1500 ادام ءوتىنىم بەردى.
رەسپۋبليكا الاڭىنان باستالعان جۇگىرۋ باعىتى ءال-فارابي داڭعىلى بويىمەن سوزىلىپ، قاتىسۋشىلار اسقار الاتاۋدىڭ اسەم بەينەسىن تاماشالاي الادى. جول بويىندا تۇڭعىش پرەزيدەنت ساياباعى، بوتانيكالىق ب ا ق جانە قالانىڭ تاريحي ماڭىزى زور باسقا دا كورىكتى ورىندارى ورنالاسقان. قاتىسۋشىلارعا بىرنەشە تاڭداۋ بار: مارافون 42،2 كم، جارتىلاي مارافون 21،1 كم، 10 كم قاشىقتىق جانە سكانديناۆيالىق ءجۇرىس 10 كم. كورپوراتيۆتىك كوماندالار ءۇشىن «ەكيدەن» ەستافەتاسى ۇيىمداستىرىلادى، وندا مارافون قاشىقتىعى التى قاتىسۋشى اراسىندا بولىنەدى. مارەگە جەتكەندەردىڭ بارلىعىنا ەستەلىك مەدال تابىستالادى، ال نەگىزگى قاشىقتىق جەڭىمپازدارىنا اقشالاي سەرتيفيكات، مەدال، ماداقتاما قاعازدارى جانە باعالى سىيلىقتار بەرىلەدى.
Almaty Marathon جىل سايىن اۋقىمى مەن قايىرىمدىلىق باعىتىن كەڭەيتىپ كەلەدى. قور قۇرىلعان كۇننەن باستاپ قاتىسۋشىلاردىڭ سورەلىك جارنالارىنان تۇسكەن قارجىنىڭ ءبىر بولىگى بالالارعا ارنالعان الەۋمەتتىك جوبالارعا جۇمسالىپ كەلەدى. بيىل «ءبىرىنشى بولۋ باتىلدىق» قورى «AYALA» قايىرىمدىلىق قورىمەن بىرلەسىپ، شىمكەنت پەن تۇركىستان وبلىسىنداعى ەكى پەريناتالدىق ورتالىققا جالپى قۇنى 106 241 284 تەڭگە بولاتىن زاماناۋي دياگنوستيكالىق جابدىقتار تاپسىردى. 14 جىل ىشىندە قور 370 ميلليون تەڭگەدەن اسا قايىرىمدى ىسكە دەمەۋشى بولدى. ولاردىڭ ماقساتى سابيلەر اراسىنداعى مۇگەدەكتىك دەڭگەيىن تومەندەتۋ، سپورتتى قولجەتىمدى ەتۋ جانە ۇلت دەنساۋلىعىن نىعايتۋ. جاڭا قايىرىمدىلىق باستامالارى تۋرالى ۇيىمداستىرۋشىلار جاقىندا جاريالايدى.
«Almaty Marathon – قازاقستانداعى حالىقارالىق AIMS كۇنتىزبەسىنە ەنگەن جالعىز ستارت. ءبىز ءۇشىن بۇل – سپورتتى بارشاعا جاقىنداتۋدىڭ، ەلدى الەمگە تانىتۋدىڭ جولى. بيىل ءبىز تاريحىمىزداعى ەڭ كوپ شەتەلدىك قاتىسۋشىنى قابىلداپ وتىرمىز».
«ءبىرىنشى بولۋ – باتىلدىق» كورپوراتيۆتىك قورىنىڭ سورەلەرى» – قازاقستانداعى حالىقارالىق مارافوندار مەن جارىستار كۇنتىزبەسىنە (AIMS) كۇنتىزبەسىنە ەنگەن جالعىز سورە. AIMS – 115 ەلدەن 445 مارافوندى بىرىكتىرەتىن قاۋىمداستىق. Almaty Marathon – سولاردىڭ ىشىندەگى ەڭ ءىرىسى ءارى قور تاريحى وسى شارادان باستاۋ الادى. ونىڭ ماقساتى – سپورتتى بۇقاراعا قولجەتىمدى ەتۋ. بۇل مارافون ادامداردى بىرىكتىرىپ قانا قويماي، ءتۋريزمدى دامىتادى، بيزنەستى قولدايدى جانە ەلدىڭ حالىقارالىق بەدەلىن ارتتىرادى. بيىل ءبىز رەكوردتىق كورسەتكىشكە جەتتىك – الەمنىڭ 60-تان استام ەلىنەن 1200-دەن استام شەتەلدىك قاتىسىپ وتىر»، - دەدى قوردىڭ قامقورشىلىق كەڭەسىنىڭ ءتوراعاسى عالىمجان ەسەنوۆ.
Almaty Marathon تۇركى ەلدەرىنىڭ TAN سەرياسىنا كىرەدى، ال ونىڭ جارىس جولدارى World Athletics تالاپتارىنا ساي سەرتيفيكاتتالعان. مارافون ەكولوگيالىق ستاندارتتارعا دا نازار اۋدارادى: ءبىر رەتتىك قۇرىلىمداردى ازايتىپ، قالدىقتى قايتا وڭدەۋ ءۇشىن جەرگىلىكتى كومپانيالارمەن ارىپتەستىك ورناتقان. EcoNetWork سەرىكتەستىگى ينتەراكتيۆتى ەكولوگيالىق ايماق ورناتادى. قاتىسۋشىلار سورەدە قاجەتسىز جىلى كيىمدەرىن ارنايى ورىنعا قالدىرا الادى، كەيىن «جىلۋ» جوباسىنىڭ ەرىكتىلەرى ولاردى سۇرىپتاپ، مۇقتاج جاندارعا ۇلەستىرەدى. قالا تۇرعىندارى دا بۇل قايىرىمدى ىسكە بوتانيكالىق باقتىڭ كىرەبەرىسىنە قويىلعان ارنايى جاشىك ارقىلى اتسالىسا الادى.
«Almaty Marathon بىرنەشە جىلدان بەرى ينكليۋزيۆتىلىگىمەن، ۇيىمداستىرۋ ساپاسىمەن جانە اۋقىمىمەن كوش باستاپ كەلەدى. ءبىز سپورتتىق شارا وتكىزۋمەن عانا شەكتەلمەيمىز، ادامداردى سانالى تۇردە سپورتپەن شۇعىلدانۋعا باۋليمىز. جىل بويى A’SU Team by Almaty Marathon تەگىن جاتتىعۋلارى وتەدى، قىستا 42،2 كم قاشىقتىققا تىركەلگەندەر ءۇشىن اشىق توپ جۇمىس ىستەيدى. بيىل ءبىز Community Almaty Run اتتى اپتا سايىنعى كەزدەسۋلەردى باستادى، وندا بىرگە جۇگىرەمىز، دارىستەر تىڭدايمىز، ەكولوگيادان باستاپ سپورتقا دەيىنگى ءتۇرلى تاقىرىپتاردى تالقىلايمىز. مارافون كاسىبي سپورتشىلار ءۇشىن دە، اۋەسقويلار ءۇشىن دە اشىق، قوعامداعى وڭ وزگەرىستەرگە ىقپال ەتەدى»، - دەدى قوردىڭ اتقارۋشى ديرەكتورى سالتانات قازىبايەۆا.
قاتىسۋشىلاردىڭ قاۋىپسىزدىگىن الماتى قالاسى پوليسيا دەپارتامەنتىنىڭ وكىلدەرى، باس دارىگەر جانە ۇيىمداستىرۋ توبى قامتاماسىز ەتەدى. بارلىق قاشىقتىق بويىندا 10 ۆەلومەديك، 90 مەديسينالىق ەرىكتى، 13 مەديسينالىق بەكەت جانە 12 جەدەل جاردەم كولىگى قىزمەت كورسەتەدى. سورە-مارەدە «قىزىل» جانە «سارى» ايماقتارعا بولىنگەن مارەلىك گوسپيتال جۇمىس ىستەيدى. جالپى 70-تەن استام دارىگەر مەن مەديسينا قىزمەتكەرلەرى جۇمىلدىرىلادى.
قاتىسۋشىلاردىڭ جايلىلىعى ءۇشىن جارىس بويىندا تاماق پەن سۋ بەكەتتەرى، زات ساقتايتىن ورىندار جانە كيىم اۋىستىراتىن بولمەلەر ۇيىمداستىرىلادى. بيىل العاش رەت انا مەن بالاعا ارنالعان بولمە، ايەلدەرگە ارنالعان تولىق جابدىقتالعان سانيتارلىق توراپتار جانە ەرەكشە قاجەتتىلىگى بار ادامدارعا ارنالعان اجەتحانالار بولادى.