2025 جىلدىڭ قاڭتار-شىلدە ايلارىندا الماتىداعى تۋريستىك ينفراقۇرىلىمعا سالىنعان ينۆەستيسيا كولەمى 92،2 ملرد تەڭگەگە جەتتى. بۇل وتكەن جىلمەن سالىستىرعاندا 62%-عا ارتىق. بۇل تۋرالى قالانىڭ تۋريزم باسقارماسى حابارلادى.
قاراجات جاڭا قوناق ءۇي نىساندارىن سالۋعا، قولدانىستاعى ينفراقۇرىلىمدى جاڭعىرتۋعا جانە قىزمەت كورسەتۋ ساپاسىن ارتتىرۋعا باعىتتالدى. مۇنىڭ ءبارى الماتىنىڭ حالىقارالىق تۋريستىك ارەناداعى ورنىن نىعايتا ءتۇستى.
وسى كەزەڭدە تۋريزمنەن تۇسكەن سالىق ءتۇسىمى 46،9 ملرد تەڭگە بولدى. ونىڭ ىشىندە قوعامدىق تاماقتانۋ سالاسى – 21،2 ملرد تەڭگە (45،2%)، سپورت جانە دەمالىستى ۇيىمداستىرۋ – 8 ملرد تەڭگە (17%)، ۋاقىتشا ورنالاستىرۋ قىزمەتىنەن 4،6 ملرد تەڭگە (9،8%) تۇسكەن.
«ينۆەستيسيا مەن سالىق ءتۇسىمىنىڭ ءوسۋى الماتىداعى تۋريزم سالاسىنىڭ قالانىڭ ەكونوميكاسىنداعى نەگىزگى قوزعاۋشى كۇشتەردىڭ بىرىنە اينالىپ كەلە جاتقانىن كورسەتەدى. بۇل قاراجات ينفراقۇرىلىمدى دامىتۋعا، سەرۆيستى جاقسارتۋعا جانە زاماناۋي ساپا ستاندارتتارىن قالىپتاستىرۋعا مۇمكىندىك بەرەدى»، – دەپ اتاپ ءوتتى تۋريزم باسقارماسىندا.
ءتۋريزمدى دامىتۋ قوناقتاردىڭ الماتىعا دەگەن قىزىعۋشىلىعىنىڭ ارتۋىن عانا ەمەس، سونداي-اق قالانىڭ جۇيەلى جۇمىسىن دا كورسەتەدى: بيزنەسكە جاڭا مۇمكىندىكتەر جاسالىپ، قىزمەت تۇرلەرى كەڭەيىپ، زاماناۋي ستاندارتتار ەنگىزىلۋدە. مۇنىڭ ءبارى الماتىنىڭ وڭىردەگى باستى تۋريستىك ورتالىقتاردىڭ ءبىرى رەتىندەگى مارتەبەسىن نىعايتادى.