كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ بازاسىندا جاڭا ەندوسكوپيالىق وقۋ ورتالىعى اشىلدى.
بۇل ورتالىقتا تەك قازاقستاننان عانا ەمەس، ورتالىق ازيا ەلدەرىنەن كەلگەن ەندوسكوپيست-دارىگەرلەر دە بىلىكتىلىكتەرىن ارتتىرا الادى.
ورتالىق Evis X1 ەندوسكوپيالىق جۇيەلەرى مەن جوعارى تەحنولوگيالى سيمۋلياتورلار سياقتى ەڭ زاماناۋي قۇرال-جابدىقتارمەن جابدىقتالعان. بۇل وقۋ پروسەسىن حالىقارالىق ستاندارتتارعا ساي دەڭگەيدە ۇيىمداستىرۋعا مۇمكىندىك بەرەدى.
«ورتالىقتىڭ اشىلۋىنا الەمدىك مەديسينالىق جابدىقتار ءوندىرىسىنىڭ كوشباسشىسى – Olympus كومپانياسىمەن ستراتەگيالىق ارىپتەستىگىمىز ىقپال ەتتى. سەرىكتەستەرىمىزگە كورسەتكەن قولداۋى ءۇشىن شىنايى العىسىمدى بىلدىرەمىن. جاڭا ورتالىق ءبىزدىڭ دارىگەرلەرمەن قاتار وزبەكستان، تاجىكستان، تۇرىكمەنستان جانە قىرعىزستاننان كەلگەن ارىپتەستەرىمىز ءوز داعدىلارىن شىڭداپ، تاجىريبە الماسىپ، الدىڭعى قاتارلى تەحنولوگيالاردى مەڭگەرەتىن ماڭىزدى الاڭعا اينالاتىنىنا سەنەمىن. بۇل مامانداردىڭ بىلىكتىلىگىن ارتتىرۋمەن قاتار، دياگنوستيكا مەن مەديسينالىق كومەكتىڭ ساپاسىن ارتتىرۋعا مۇمكىندىك بەرەدى»، – دەپ اتاپ ءوتتى ينستيتۋتتىڭ باسقارما ءتوراعاسى رۇستەم تولەۋتايەۆ.
«ترەنينگ ورتالىعىن قۇرۋعا قازاقستان، جاپونيا، پولشا جانە چەحيا كوماندالارىنىڭ اتسالىسقانىنا قۋانىشتىمىز. ورتالىق مامانداردى دايارلاۋ، ءبىلىم الماسۋ جانە جوعارى ستاندارتتاردى ەنگىزۋ سالالارىندا جاڭا مۇمكىندىكتەر اشادى»، – دەدى Olympus Corporation وكىلى يوحي ماەدا (جاپونيا).
وقۋ ورتالىعىنىڭ باعدارلامالارىنا تەوريالىق كۋرستارمەن قاتار، سيمۋلياتورلاردا جانە ناقتى كلينيكالىق جاعدايدا وتكىزىلەتىن كەڭ كولەمدى پراكتيكالىق ساباقتار دا كىرەدى. بۇل وقۋ پروسەسىنىڭ تيىمدىلىگىن بارىنشا ارتتىرۋعا مۇمكىندىك بەرەدى.
«وقۋ ورتالىعى – بۇل ەندوسكوپيالىق دياگنوستيكانى جاڭا دەڭگەيگە كوتەرەتىن زاماناۋي ءبىلىم بەرۋ حابى. ءبىز ءوز دارىگەرلەرىمىزدى ساپالى كولونوسكوپيا ادىستەرىنە ۇيرەتىپ قانا قويماي، ADR كورسەتكىشىن ەسەپتەۋ جۇيەسىن ەنگىزەتىن بولامىز. بۇل كورسەتكىش – تىك ىشەك پەن توق ىشەك قاتەرلى ىسىگىمەن كۇرەستەگى شەشۋشى فاكتور. ونى قولدانۋ مىڭداعان ادامنىڭ ءومىرىن ساقتاپ قالۋعا مۇمكىندىك بەرەدى»، – دەدى باسقارما ءتوراعاسىنىڭ عىلىمي-كلينيكالىق جانە يننوۆاسيالىق قىزمەت جونىندەگى ورىنباسارى جاميليا قايبۋللايەۆا.
بۇل ماڭىزدى وقيعا قازاقستانداعى مەديسينالىق ءبىلىم بەرۋ مەن تەحنولوگيالاردى دامىتۋدىڭ جاڭا كەزەڭىنىڭ باستالعانىن بىلدىرەدى.