بيىل كونكۋرستان وتكەن 19 كينوجوبانىڭ تۇسىرىلىمىنە دايىندىق باستالدى.ولاردىڭ قاتارىندا 2011 جىلى تارازدا لاڭكەستى ۇستاۋ كەزىندە ەرلىكپەن قازا تاپقان عازيز بايتاسوۆ تۋرالى «كاپيتان بايتاسوۆ» ءفيلمى بار.
اۆتورلار بۇل تۋىندى ارقىلى ەل تىنىشتىعىن قورعاۋ جولىندا ءومىرىن قيعان قۇقىق قورعاۋ ورگاندارى قىزمەتكەرلەرىنىڭ باتىلدىعىن دارىپتەمەك. ال «الان تۋرالى اڭىز» انيماسيالىق ءفيلمى بالالاردى وتاندى سۇيۋگە، دوستىققا ادال بولۋعا جانە مەيىرىمدىلىككە شاقىرادى. قازىرگى قوعامنىڭ دەرتىنە اينالعان لۋدومانيا تاقىرىبىن قوزعايتىن «يگرومانكا» جوباسى دا كورەرمەنگە ۇسىنىلادى، دەپ حابارلايدى اlmaty-akshamy.kz.
«قايرات» ءفيلمى جاستاردىڭ سالاۋاتتى ءومىر سالتىن ۇستانۋعا جانە سپورتقا دەگەن قۇلشىنىسىن وياتادى. ۇلتتىق كينونى قولداۋ مەملەكەتتىك ورتالىعىنىڭ باسقارما ءتوراعاسى قۇرمانبەك جۇماعالي پيچينگتەن وتكەن كينوجوبا اۆتورلارىمەن كەزدەستى. ول شىعارماشىلىق توپ وكىلدەرىن بولىنگەن قاراجاتتى ماقساتتى جۇمساپ، ساپالى تۋىندى تۇسىرۋگە شاقىردى. ءارى ورتالىق ماماندارى تاراپىنان بارلىق جوبا العاشقى كۇننەن، ياعني «تارەلكا سىندىرۋدان» باستاپ، پرەمەراعا دەيىن باقىلاۋدا بولاتىنىن ەسكەرتتى.
«بۇل فيلمدەر بيۋدجەت ەسەبىنەن تۇسىرىلەتىندىكتەن، ەرتەڭگى كۇنى مىندەتتى تۇردە حالىقتىڭ سۇراۋى بولاتىنىن ۇمىتپاڭىزدار. سوندىقتان، بولىنگەن ءار تيىندى ەسەپپەن، ماقساتتى جۇمساۋدى سۇرايمىن. ءبىز ءوز تاراپىمىزدان ءار جوبانىڭ باسى-قاسىندا بولامىز. فيلمدەر ساپالى بولۋى ءتيىس. تەك فەستيۆالدەردە توپ جارىپ قويماي، ءوز الدىنا تابىس اكەلەتىن دەڭگەيگە جەتۋى كەرەك»، – دەدى قۇرمانبەك جۇماعالي.
كينوورتالىق باسشىسى اۆتورلارعا قازىردەن باستاپ جوبالارىن جارنالاماۋدى جانە ماركەتينگ جوسپار جاساۋدى تاپسىردى. قىسقامەتراجدى جانە دەرەكتى فيلم اۆتورلارى وسى باستان وتاندىق تەلەارنالارمەن كەلىسىپ، تۇسىرگەن تۋىندىلارىن كوگىلدىر ەكرانعا شىعارۋ جاعىن ۇيىمداستىرۋى كەرەك. ال تولىقمەتراجدى كارتينالاردىڭ پرەمەراسى استانا مەن الماتى قالاسىندا قاتار ءوتۋى قاجەت.
«كينو – جاي عانا ونەر ەمەس، قوعامنىڭ ۇلتتىق يدەولوگياسىن قالىپتاستىراتىن مىقتى قۇرال. سوندىقتان، ءار جوبانىڭ ۇلتتىق يدەولوگياعا ساي بولۋىن قاداعالايمىز. جاڭا تۋىندىلاردا ۇرپاق تاربيەسىنە وڭ ىقپال ەتەتىن، كورەرمەنگە وي سالاتىن يدەيالار دارىپتەلەتىن بولادى»، – دەدى قۇرمانبەك جۇماعالي.