الماتى وبلىسىنىڭ پوليسەيلەرى ينتەرنەت-الاياقتىقتىڭ الدىن الۋعا جانە ازايتۋ ماقساتىندا بارلىق قاجەتتى ءىس-شارالاردى جۇرگىزۋدە.
جىل باسىنان بەرى 32 الاياق ۇستالدى، دەپ حابارلايدى aqshamnews.kz Polisia.kz-كە سىلتەمە جاساپ.
– جىل باسىنان بەرى وبلىستا 747 ينتەرنەت-الاياقتىق فاكتىسى تىركەلدى. ءقازىر زارداپ شەككەندەرگە 16 ميلليون تەڭگەگە جۋىق وتەماقى تولەندى. ارينە، بۇل شامالى سوما، ءبىراق قۇقىق قورعاۋ ورگاندارى حالىق اراسىندا اۋقىمدى پروفيلاكتيكالىق جۇمىستى جالعاستىرۋدا. جىل باسىنان بەرى ينتەرنەت-الاياقتىق جاساعانى ءۇشىن پوليسيا قىزمەتكەرلەرىمەن 32 ادام ۇستالدى، – دەپ اتاپ ءوتتى وبلىستىق كريمينالدىق پوليسيا باسقارماسىنىڭ ورىنباسارى نۇرجان كەڭەسحان ۇلى.
كيبەرقىلمىسپەن كۇرەسۋ ماقساتىندا وبلىس پوليسەيلەرى تۇراقتى تۇردە ۇگىت-ناسيحات جانە پروفيلاكتيكالىق ءىس-شارالار وتكىزىپ، تۇرعىندارعا ينتەرنەت الاياقتارىنىڭ قۇربانى بولماۋ جولدارى تۇسىندىرىلۋدە. تەك جىل باسىنان بەرى ءتارتىپ ساقشىلارى وبلىس تۇرعىندارى اراسىندا 37 شارا وتكىزىپ، 15 مىڭنان استام كىتاپشالار مەن تاقىرىپتىق بۋكلەتتەر تاراتتى. قوعامدىق ورىنداردا 15 بيلبورد پەن 13 LED ەكران ورناتىلعان. سونىمەن قاتار، بارلىق جەردە دىبىس زورايتقىش قۇرىلعىلار ارقىلى ساقتىق شارالارى تۋرالى ماتىندەر تاراتىلادى. كەزدەسۋ بارىسىندا ەلىمىزدىڭ جەتەكشى بانكتەرىنىڭ وكىلدەرىمەن جۇمىس كەزدەسۋى باستالىپ، ينتەرنەت-الاياقتىقپەن كۇرەسۋ ماسەلەلەرى تالقىلاندى.
– بۇل تۇرعىدا كوپ نارسە ازاماتتاردىڭ وزىنە بايلانىستى، بارلىعىن قىراعىلىق تانىتىپ، الاياقتاردىڭ ايلا-امالىنا تۇسپەۋلەرىن سۇرايمىز. بانكتىك شوتتارىڭىزعا قاتىستى قىلمىستىق ارەكەتتەر تۋرالى حاباردار بولساڭىز، ەموسياعا بەرىلمەڭىز، بانكتىڭ رەسمي تەلەفون نومىرىنە قوڭىراۋ شالۋ ارقىلى اقپاراتتى تەكسەرىپ، فيليالعا جەكە كەلىڭىز. سىزگە پوليسيا قىزمەتكەرلەرىنەن، سوت ورىنداۋشىلارىنان نەمەسە باسقا لاۋازىمدى تۇلعالاردان سىزگە قويىلعان شەكتەۋلەر تۋرالى نەمەسە جازاتايىم وقيعاعا ءسىزدىڭ تۋىستارىڭىز كىنالى دەگەن حابارلاما كەلىپ تۇسكەن جاعدايدا، جوعارىدا ايتىلعان ىستەردى ورىنداڭىز. رەسمي ارنالار ارقىلى سىزدەن اقشا تولەۋگە نەمەسە قانداي دا ءبىر قارجىلىق وپەراسيالاردى جۇزەگە اسىرۋعا قاجەتتى اقپاراتتى تەكسەرۋدى ۇمىتپاڭىز. بۇل كۇماندى شەشۋدىڭ جانە الاياقتاردىڭ جەلىسىنەن اۋلاق بولۋدىڭ ەڭ سەنىمدى جولى، – دەپ قوستى ن.كەڭەسحان ۇلى.