وقۋ جىلى قارساڭىندا ستۋدەنتتەردى تاسىمالداۋعا ارنالعان قوسىمشا ۆاگوندار جولعا شىعادى.
بۇل جۇمىس "جولاۋشىلار تاسىمالى" اكسيونەرلىك قوعامىمەن بىرلەسە جۇرگىزىلەدى.
جاڭا وقۋ جىلى قارساڭىندا باتىس وڭىرلەرى تۇرعىندارىنىڭ سۇرانىسىنا سايكەس قوسىمشا مارشرۋتتاردى ىسكە قوسۋ تۋرالى شەشىم قابىلداندى. پويىزدار اقتاۋ جانە اتىراۋ قالالارىنان شىعىپ، الماتى قالاسىنا دەيىن ستۋدەنتتەردى تاسىمالدايدى، دەپ حابارلايدى aqshamnews.kz كولىك مينيسترلىگىنە سىلتەمە جاساپ.
كونديسيونەرلەرى قاراستىرىلعان جاڭا ۆاگوندار جازعى ۋاقىتتا ەلىمىزدىڭ اۋماعى بويىنشا باسقا باعىتتارعا قاتىنايدى، سول سەبەپتى جوعارىدا اتالعان ۆاگونداردا كونديسيونەر جۇيەسى بولمايدى. تەمىرجول جانە سۋ كولىگى كوميتەتى جاس جولاۋشىلاردان قولايسىزدىقتار ءۇشىن الدىن-الا كەشىرىم سۇرايدى.
مارشرۋتتارعا ناقتى توقتالساق:
اقتاۋ-الماتى باعىتىندا قوسىمشا 360 جولاۋشىعا ارنالعان 8 جولاۋشى ۆاگونى قاتىنايدى.
بۇل باعىتتاعى ۆاگون 21 تامىز كۇنى اقتاۋدان شىعىپ، 23 تامىز كۇنى الماتىعا جەتەدى.
اتىراۋ-الماتى باعىتىنا تەمىرجولشىلار قوسىمشا 3 ۆاگون قوسادى. بۇل ۆاگوندار 540 جولاۋشىعا ارنالعان. اتىراۋ-الماتى باعىتىندا پويىزدار 16،18،20،22 تامىزدا قاتىنايدى.
ستۋدەنتتەر اقتاۋ جانە اتىراۋ قالالارىنىڭ ۆوكزالدارىنان تەمىرجول بيلەتتەرىن ساتىپ الا الادى.
ستۋدەنتتەردىڭ وتىنىشتەرىنە سايكەس كولىك مينيسترلىگى قوسىمشا ۆاگوندار قويۋعا دايىن.
ەستەرىڭىزگە سالا كەتەيىك، بيىل جاڭا ۆاگوندار پاركى 140 بىرلىككە جاڭارتىلادى. كەلەسى جىلى تاعى 226 جاڭا ۆاگون كەلەدى. ۆاگوندار پاركىن جاڭارتۋ جۇمىستارى جالعاسۋدا.