كونسەرتتەر، فلەشموبتار، جۇگىرۋ مارافونى مەن مىڭداعان شات كۇلكى: الماتىدا قازاقستان حالقىنىڭ بىرلىگى كۇنى تويلاندى، دەپ حابارلايدى aqshamnews.kz
الماتىدا قازاقستان حالقى اسسامبلەياسىنىڭ 30 جىلدىعىنا وراي قازاقستان حالقىنىڭ بىرلىگى كۇنى كەڭ كولەمدە اتالىپ ءوتتى. مەرەكەلىك باعدارلاما «بىرلىگى جاراسقان الماتى» دەگەن اتاۋمەن ءوتتى.
باستى ءىس-شارا اباي اتىنداعى الاڭدا، رەسپۋبليكا سارايىنىڭ الدىندا ۇيىمداستىرىلىپ، مىڭداعان قالا تۇرعىنى مەن قوناعى جينالدى. كۇننىڭ باستى وقيعالارىنىڭ ءبىرى - 11.00-دەن باستالىپ، 21.00-گە دەيىن سوزىلاتىن كونسەرت. مەرەكەگە قالا اكىمى ەربولات دوسايەۆ قاتىستى.
ساحناداعى اتموسفەرانى قازاقستاندىق ەسترادا جۇلدىزدارى – L Duo دۋەتى، پيانيست Ratovich ، «دەرۆيشي» جانە Madein KZ توپتارى جانە باسقالار جاسادى. كونسەرتتىڭ حەدلاينەرلەرى ق ر حالىق ءارتىسى روزا رىمبايەۆا مەن باشقۇرتستاننان كەلگەن Ay Yola توبى بولدى.
مەرەكەلىك ءىس-شارالار الماتىنىڭ بارلىق اۋدانىندا ءوتتى: ەتنومادەني بىرلەستىكتەر قوناقتاردى ۇلتتىق بي بيلەپ، ءان ايتىپ جانە ءداستۇرلى تاعامدار ۇسىندى. سونىمەن قاتار، قالادا جارمەڭكەلەر، سپورتتىق تۋرنيرلەر، اۋلا كونسەرتتەرى مەن ەكولوگيالىق اكسيالار ۇيىمداستىرىلدى.
مەكتەپ وقۋشىلارىنان باستاپ زەينەتكەرلەرگە دەيىن 300 – گە جۋىق ادام قاتىسقان تۇڭعىش پرەزيدەنت ساياباعىنداعى «بىرلىك جۇگىرىسى» بىرلىكتىڭ سيمۆولى بولدى. ال اباي الاڭىندا ەلدى ەرەكشە قىزىقتىرعان نىساننىڭ ءبىرى قازاقستان حالقى اسسامبلەياسىنىڭ تاريحىنا ارنالعان «حالىقتار بىرلىگى نازاردا» اتتى فوتوكورمەسى ەدى.
«بىرلىك كۇنى – ءبىزدىڭ باستى كۇشىمىز – مادەني ارتۇرلىلىك ەكەنىن ەسكە سالاتىن كۇن. الماتى — ۇلتارالىق كەلىسىم مەن دوستىقتىڭ قالاسى. اسسامبلەيانىڭ مەرەيتويلىق جىلىندا ءاربىر تۇرعىن ءوزىن ۇلكەن، ۇيىمشىل قوعامنىڭ ءبىر مۇشەسى رەتىندە سەزىنۋى ءۇشىن جۇمىسىمىزدى جالعاستىرامىز. بۇل قوعامدا مادەنيەت، ءداستۇر مەن ءوزارا قۇرمەت ەڭ جوعارى قۇندىلىق سانالادى»، – دەدى الماتى قالاسى قازاقستان حالقى اسسامبلەياسى ءتوراعاسىنىڭ ورىنباسارى ۆسيەۆولود لۋكاشيەۆ.
قازاقستان ۇيعىرلارىنىڭ رەسپۋبليكالىق مادەني ورتالىعىنىڭ ءتوراعاسى ابدۋلحاليل دولكۋنتاي:
«بۇل كۇن – ءبىز ءۇشىن جاي عانا مەرەكە ەمەس، ورتاق تاريح پەن تاعدىردىڭ سيمۆولى. ءبىز ءاربىر ۇلت ءداستۇرىن ساقتاپ، ەل دامۋىنا ۇلەس قوسا الاتىن مەملەكەتتە ءومىر ءسۇرىپ جاتقانىمىزدى ماقتان تۇتامىز. مۇنداي ءىس-شارالار ءوزارا تۇسىنىستىك پەن مادەني الۋاندىقتىڭ ەلىمىزدىڭ بولاشاعى ءۇشىن قانشالىقتى ماڭىزدى ەكەنىن كورسەتەدى»، – دەدى.
كەشكە اباي الاڭىنداعى كونسەرتتە ايقىن تولەپبەرگەن، بۇركىت، «مارسەل» توبى جانە باسقا دا ارتىستەر ونەر كورسەتەدى دەپ كۇتىلۋدە.
