بيىلعى انت قابىلداۋ ءراسىمى بۇكىل ەل بولىپ ۇلىقتاپ جاتقان ۇلى جەڭىستىڭ 80 جىلدىعىمەن قاتار كەلىپ وتىر. سوندىقتان كوكتەم ايىندا شەكاراشىلار ساپىنا الىنعان جاس ساربازدار ءۇشىن بۇگىنگى شارانىڭ ماڭىزى ەرەكشە.
ۇقك شەكارا قىزمەتى الماتى وبلىسى بويىنشا دەپارتامەنتىنىڭ وقۋ بازاسىندا وتكەن راسىمدە 500-گە جۋىق جاس سارباز وتانىنا ادال قىزمەت ەتۋگە سالتاناتتى تۇردە سەرت بەردى. «سارباز بولدىم، مىنەكي» دەمەكشى، وسى ساتتەن باستاپ وتان قورعاۋشىلاردىڭ قاتارىنا قوسىلعان جاس ساربازداردىڭ ومىرىندەگى ەڭ ساۋلەلى كەزەڭگە كۋا بولۋ ءۇشىن الىستان اتا-انالارى، تۋعان-تۋىستارى مەن دوستارى ارنايى كەلدى. اتاپ وتەرلىگى، ساپ تۇزەگەن ساربازدار ەلىمىزدىڭ بارلىق وڭىرلەرىنەن اسكەرگە شاقىرىلعان.
شاراعا «گەنەرالدار كەڭەسى» رەسپۋبليكالىق قوعامدىق بىرلەستىگى پرەزيديۋمىنىڭ ءتوراعاسى، وتستاۆكاداعى گەنەرال-لەيتەنانت بەكسۇلتان سارسەكوۆ، شەكارا قىزمەتىنىڭ ارداگەرى، اسكەري عىلىمدار دوكتورى، پروفەسسور، قازاقستان رەسپۋبليكاسى اسكەري عىلىمدار اكادەمياسىنىڭ اكادەميگى، وتستاۆكاداعى گەنەرال-مايور شىنتاس وتەپوۆ، سونداي-اق ناۋرىزباي اۋدانىنىڭ قۇزىرلى ورگاندارىنىڭ وكىلدەرى قاتىستى.
ەلىمىزدىڭ مەملەكەتتىك ءانۇرانى شىرقالعاننان كەيىن انت قابىلداۋ ءراسىمى باستالدى. ساربازداردىڭ بىركەلكى جۇرىستەرى مەن قيمىلدارى ولاردىڭ اسكەري تارتىپكە بوي ۇيرەتىپ، تەمىردەي تارتىپكە قالىپتاسىپ ۇلگەرگەنىن اڭعارتتى.
ساربازدار دەپارتامەنت باستىعى، پولكوۆنيك الىبەك امانگەلدى ۇلى كايۋپوۆ پەن ارداگەر ساردارلاردىڭ الدىندا انت بەردى. ءراسىمنىڭ كەلەسى بولىمىندە – ناعىز شەكاراشىعا اينالعان ساربازداردى قۇتتىقتاۋ ءساتى ءوتتى. قوناقتار جاس ساربازدارعا الداعى قىزمەتتەرىنە ساتتىلىك تىلەپ، اق باتالارىن بەردى.
شارا بارىسىندا پولكوۆنيك الىبەك كايۋپوۆ «سروچنيك 2.0» باعدارلاماسى اياسىندا «كوكتەم–2024» شاقىرىلىمىندا ۇزدىك شىققان جەتى ساربازعا سەرتيفيكات تابىستادى. بۇل قۇجاتتار ساربازداردىڭ وزدەرى قالاعان جوعارى وقۋ ورىندارىنا تۇسۋلەرىنە مۇمكىندىك بەرەدى. پولكوۆنيك ولاردىڭ وتان الدىنداعى قىزمەتىنە العىس ءبىلدىردى.
شەكاراشىلاردىڭ كەز كەلگەن شاراسى دەپارتامەنتتىڭ سايىپقىراندارى قاتىساتىن ەرەكشە كورىنىستەرمەن جالعاساتىنى بەلگىلى. بۇل جولى دا ولار قويان-قولتىق ۇرىستىڭ جانە شەكارا بۇزۋشىنى قۇرىقتاۋ تاسىلدەرىنىڭ ءادىس-امالدارىن كوپشىلىككە شەبەر كورسەتتى. سونىمەن قاتار، شەكارا قىزمەتى قىزمەتتىك كينولوگيا باسقارماسىنىڭ ماماندارى ۇلتتىق ماقتانىشىمىزعا اينالعان تازى مەن توبەتتى ورتاعا شىعارىپ، ولاردىڭ ەرەكشە دايىندىعىن پاش ەتتى.
سونداي-اق، جينالعان جۇرت ساربازداردىڭ اتا-انالارى مەن باۋىرلارى الدىندا ساپ تۇزەپ وتكەن اتبەگىلەر مەن ولاردىڭ قىزمەت اتتارىنىڭ ونەرىن تاماشالادى.
شارا سوڭىندا دەپارتامەنتتىڭ جاۋاپتى تۇلعالارى اتا-انالارمەن جۇزدەسىپ، كوپشىلىكتى مازالاعان سۇراقتارعا تۇشىمدى جاۋاپ بەردى.