ۇلاعاتتى ۇستاز ورىك يمانعوجينا تۋرالى ءبىر ۇزىك سىر
ەءلىمىزدە ادىلەتتى قوعام قۇرۋ باعىتىندا اۋقىمدى ساياسي-الەۋمەتتىك، ەكونوميكالىق رەفورمالار قارقىندى جۇرگىزىلۋدە. بۇگىندە ءبىلىم، عىلىم، دەنساۋلىق، تۇرمىس ساپاسى، مادەنيەت، تاريح، ادەبيەت سىندى قۇندىلىقتارىمىزدى قادىر-قاسيەتىمەن دامىتۋ ۇزدىكسىز، جان-جاقتى ءجۇرىپ جاتقانىنا كۋامىز. سولاردىڭ ىشىندە ءبىلىم بەرۋ ىسىندە زامان تالابىنا وراي جاڭاشىلدىقتار كوپ – ۇلتتىق بولمىسىمىزدىڭ ساپاسىن كوتەرۋ قىزمەتىندە مىڭداعان ۇستازدارىمىز مەن پەداگوگ-عالىمدارىمىز ءبىلىمنىڭ بۇگىنگە دەيىنگى وڭ مۇرالارىن جاڭاشىلدىقتارمەن ۇيلەستىرە ەڭبەك ەتۋدە. وسى قاتاردىڭ الدىڭعى لەگىندەگى پەداگوگ-عالىمدارىمىزدىڭ ءبىرى – ورىك يمانعوجينانىڭ دا ۇلتقا قىزمەتى ەرەكشە.
مەملەكەت باسشىسى قاسىم-جومارت توقايەۆ «ۇرپاققا ءبىلىم بەرۋ – ۇلتقا قىزمەت ەتۋ. ۇستاز – ۇلى ەسىم» دەپ تۇجىرىمداعانداي، وسىناۋ ۇلى ەسىمنىڭ يەلەرى كىمدەر دەسە، مەن ەڭ الدىمەن ورىك زاينۋللاقىزىن اتار ەدىم. ونىڭ پەداگوگيكالىق ەڭبەك جولى – باستاۋىش مەكتەپ مۇعالىمىنەن باستالىپ، اۋداندىق ادىسكەر-ينسپەكتور، وبلىستىق ءبىلىم باسقارماسى باستىعىنىڭ ورىنباسارى، مەكتەپ ديرەكتورى، ق ر ءبىلىم جانە عىلىم مينيسترلىگىنىڭ ورتا ءبىلىم بەرۋ باسقارماسى باستىعىنىڭ ورىنباسارى، وقۋلىقتىق ادەبيەتتى مونيتورينگىلەۋ ورتالىعىنىڭ باسشىسى، رەسپۋبليكالىق «وقۋلىق» عىلىمي-ادىستەمەلىك ورتالىق ديرەكتورىنىڭ ورىنباسارى، كوللەدج ديرەكتورى، جوو وقۋ-ادىستەمەلىك ءبولىمىنىڭ ءتورايىمى، ۋنيۆەرسيتەت پرورەكتورى جانە رەكتورى، «قازاقستاننىڭ عالىم ايەلدەرى» قوعامدىق بىرلىكتىڭ ۆيسە-پرەزيدەنتى لاۋازىمدارىنا جالعاستى. وسى ۇستازدىق ەڭبەك جولىنىڭ ءوزى-اق ورىك زاينۋللا قىزىنىڭ ۇلىلىققا لايىق پەداگوگ ەكەنىن ايعاقتاپ تۇر دەپ ويلايمىن.
كەيىپكەرىمىزدىڭ عىلىمي جولى دا تولاسسىز ورلەۋمەن ەرەكشەلەنەدى. «ءبىلىم بەرۋدى اقپاراتتاندىرۋ جاعدايىندا وقۋشىلاردى كاسىبي باعدارلاۋ ادىستەمەسى» دەگەن تاقىرىپتا پەداگوگيكا عىلىمىنىڭ كانديداتى دارەجەسىن العان ول مەجەلەگەن جاڭاشىلدىعىن كۇنى بۇگىنگە دەيىن جالعاستىرۋدا. بۇل باعدارىن «جاڭا اقپاراتتىق پەداگوگيكالىق تەحنولوگيالاردى جاساۋ جانە وقۋ-ادىستەمەلىك ادەبيەتتىڭ ساپاسىن دياگنوستيكالاۋ» دەپ اتالاتىن زەرتتەۋلەر كەشەنىندە ودان ءارى دامىتىپ، بارلىعى 150-دەي ەڭبەكتەرىن جاريالادى. ءبىلىم بەرۋ كەشەنىن جەتىلدىرۋ اياسىنداعى زەرتتەۋلەردىڭ بەل ورتاسىندا ءجۇردى. وقۋلىق قۇرىلىمىن ساراپتاۋدىڭ نەگىزگى كورسەتكىشتەرىن انىقتاپ، فۋنكسيالارىن ايقىندادى. الەم ەلدەرىنىڭ وقۋلىقتارىمەن سالىستىرما ساراپتاما جاسالدى. حالىقارالىق وقۋلىقتاردىڭ وقۋشى تۇلعاسىنا باعىتتالۋ يكەمدىلىگىنىڭ اقيقاتتىق سيپاتتارى باعدارعا الىندى. بۇل ماسەلەلەردىڭ قازاقستاندىق وقۋلىقتارعا قاتىستىلىعى بويىنشا ەل پرەزيدەنتىنە ۇسىنىستار بەرىلدى. وسى جۇمىستاردىڭ بارلىعىنىڭ باسى-قاسىندا ورىك يمانعوجينا ءجۇردى. ونىڭ 9، 11، 12-سىنىپتارعا ارنالعان «رۋسسكايا سلوۆەسنوست» وقۋلىعى، «وقۋلىقتار مەن وقۋ-ادىستەمەلىك كەشەندەر ساپاسىن مونيتوريگىلەۋ» ەڭبەگى، «سالاۋاتتى تاماقتانۋ مەكتەبى» اتتى وقۋ قۇرالى جانە تاعى باسقا دا شىعارماشىلىق تۋىندىلارى پەداگوگيكالىق قاۋىم تاراپىنان وڭ باعاعا يە بولدى. سالا بويىنشا وتانىمىزدىڭ يگىلىگىنە، ۇرپاق بولاشاعىنا جاساعان ەڭبەگى وڭ باعالارىن الدى، بىرەۋ ءبىلىپ، بىرەۋ بىلمەيتىن ماراپاتتارى ءوز الدىنا ۇلكەن بيىكتىك دەر ەدىم.
ءبىلىمدى ۇرپاق تاربيەلەۋ – ءار ۇستازدىڭ ۇلتقا ءمىنسىز قىزمەت ەتۋ ميسسياسىنداعى ۇلى مىندەتى. بۇل رەتتە ورىك زەينۋللا قىزى قازاق حالقىنىڭ قىمباتتى، اسىل تۇلعالىق قۇندىلىقتارىن ءوز ەڭبەگى ارقىلى تانىتقان جان. ول كىسىمەن ۇشىراسقان ادامنىڭ سوزىنە جىلۋ، جۇزىنە نۇر داريدى. ياعني كىسىمەن قارىم-قاتىناستا ادەپتى، يناباتتى سابىرمەن، كىشىپەيىل ۇلىلىعىمەن تانىلعان. سويتە تۇرا، ۇلت مۇددەسىن بارلىق فاكتورلاردان جوعارى قوياتىن پرينسيپشىلدىگى ەرەكشە. بۇگىنگى جەتپىس بەس جاسىندا پەداگوگيكالىق باي، وزىق تاجىريبەلەرىن جاس ۇرپاققا تاربيەلى ءبىلىم بەرۋدە ءالى دە پايدالانۋعا بولاتىنى ورىك زەينۋللاقىزىنا كۇش-قۋات بەرەدى دەپ سەنەمىن، شىعارماشىلىق تابىسقا جەتە بەرسىن دەيمىن. «تار ادام تالاسىپ ءجۇرىپ توزادى، كەڭ ادام كەڭەسىپ ءجۇرىپ وزادى» دەگەن حالىق ماقالىنىڭ دانالىعى تۇرعىسىنان ايتسام، ۇلاعاتتى ۇستازدىڭ ادال پەيىلى، ابىرويلى ەڭبەگى مەن ءوزىنىڭ ءار ءىسىن ەلمەن كەڭەسىپ اتقاراتىن كەڭدىگى كەيىنگى پەداگوگ جاستارىمىزعا تاعىلىم بولار ۇلگى-ونەگە دەر ەدىم.
.