بۇل شارانى FIDE – حالىقارالىق شاحمات فەدەراسياسى مەن قازاقستان شاحمات فەدەراسياسى بىرلەسىپ ۇيىمداستىردى.
كونفەرەنسيانىڭ ماقساتى — شاحماتتى ءبىلىم بەرۋ جۇيەسىنە ەنگىزۋ، ونىڭ ادىستەمەلىك، پەداگوگيكالىق جانە ستراتەگيالىق اسپەكتىلەرىن تالقىلاۋ. جيىنعا حالىقارالىق جانە قازاقستاندىق ساراپشىلار، شەتەلدىك شاحمات فەدەراسيالارىنىڭ ءتوراعالارى مەن شاحمات ماماندارى قاتىسىپ وتىر.
ءبىلىم بەرۋدەگى شاحمات بويىنشا FIDە كوميسسياسىنىڭ ءتوراعاسى دجەرري نەش تاجىريبەسىن ءبولىسۋ ءۇشىن الماتىعا ارنايى كەلىپ، كونفەرەنسياعا قاتىستى.
“مەن الماتىعا العاش رەت وسىدان 34 جىل بۇرىن كەلگەن ەدىم. ول كەزدە حالىقارالىق الماسۋ باعدارلاماسى اياسىندا كەلدىم. بۇل شاھار ماعان جات ەمەس. قايتا كەلگەنىمە قۋانىشتىمىن. قازاقستاننىڭ وسى سالاداعى باستامالارىن قولداۋ ءۇشىن كەلدىم. قازىرگى ۋاقىتتا الماتىداعى بالۋان شولاق سپورت كەشەنىندە شاحماتتان كادەتتەر اراسىندا الەم چەمپيوناتى ءوتىپ جاتىر.
FIDE‑ءنىڭ «شاحمات جانە ءبىلىم بەرۋ» جونىندەگى كوميسسياسى قازاقستاندى ۇنەمى قولداپ كەلەدى. ويتكەنى، بۇل ەل شاحماتتى ءبىلىم بەرۋ سالاسىنا جۇيەلى تۇردە ەنگىزىپ جاتىر. سول ارقىلى ءبىز بالالاردىڭ كوممۋنيكاتيۆتىك داعدىلارىن، ويلاۋ قابىلەتىن جانە ينتەللەكتۋالدىق الەۋەتتىن دامىتا الامىز.
قازاقستاندىق مەكتەپتەرگە شاحمات ءپانىن ەنگىزۋ باعدارلاماسى بىرتە-بىرتە ىسكە اسىرىلىپ جاتىر. بۇل باستاما وزگە ەلدەرگە دە ۇلگى بولارى انىق”، - دەيدى دجەرري نەش.
قازىرگى تاڭدا الەم ەلدەرى دە شاحماتتى ءبىلىم بەرۋ جۇيەسىنە ەنگىزىپ جاتىر. مىسالى، شۆەيساريادا باستاۋىش سىنىپتاردىڭ وقۋ باعدارلاماسىنا ەنگىزىلسە، شۆەسيادا شاحمات قوسىمشا ءپان رەتىندە مەكتەپتەردە كەڭىنەن قولدانىلىپ كەلەدى. يسپانيانىڭ كاتالونيا وڭىرىندە 2012 جىلدان باستاپ شاحمات رەسمي تۇردە ءبىلىم بەرۋ قۇرالى رەتىندە وقىتىلىپ جاتىر. ال مالايزيا 2025 جىلى شاحماتتى ۇلتتىق دەڭگەيدە مەكتەپ باعدارلاماسىنا ەنگىزدى. اقش-تا شاحمات تەك مەكتەپتەردە عانا ەمەس، جوعارى وقۋ ورىندارىندا دا وقىتىلادى.
حالىقارالىق ساراپشىلاردىڭ پىكىرىنشە، شاحماتتى ءبىلىم بەرۋ جۇيەسىنە ەنگىزۋ – وقۋشىلاردىڭ سىني ويلاۋىن، شەشىم قابىلداۋ قابىلەتىن دامىتۋعا زور مۇمكىندىك بەرەدى. سونىمەن قاتار، بۇل باستاما كەلەشەكتە ينتەللەكتۋالدى ۇلت قالىپتاستىرۋعا نەگىز بولا الادى.
دارمەن ءسادۋاقاسوۆ، قازاقستان شاحمات فەدەراسياسىنىڭ ۆيسە-پرەزيدەنتى:
شاحمات – سپورت ءتۇرى عانا ەمەس، ينتەللەكتۋالدى دامۋ مەن تاربيە قۇرالى رەتىندە دە ماڭىزعا يە. وسىدان ءۇش جىل بۇرىن قازاقستاندا شاحمات باعدارلاماسى 40 مەكتەپكە عانا ەنگىزىلىپ، شامامەن، 1000 بالا وقىدى. ال ءقازىر بۇل كورسەتكىش ەداۋىر ءوستى. شاحمات باعدارلاماسى 1500 مەكتەپتى قامتيدى جانە ونىڭ اياسىندا شامامەن، 60 مىڭ وقۋشى ءبىلىم الۋدا. سوندىقتان وسىنداي حالىقارالىق جانە ۇلتتىق دەڭگەيدەگى كونفەرەنسيالار مەن پىكىر الماسۋ الاڭدارىنىڭ ءمانى زور.