قالا اكىمى دارحان ساتىبالدى «دوم نا ابايا» تۇرعىن ءۇي كەشەنىندە بولىپ، وزەكتى ماسەلەلەردى تالقىلاۋ ءۇشىن تۇرعىندارمەن كەزدەستى. كەزدەسۋگە سونداي-اق «اجك» اق-نىڭ ءوندىرىس جونىندەگى اتقارۋشى ديرەكتورى مەن قالالىق قىزمەت باسشىلارى، ونىڭ ىشىندە تجد وكىلدەرى قاتىستى.
تۇرعىندار ەلەكتر قۋاتىنىڭ ءجيى ءوشىپ قالۋىنا شاعىمداندى، سونىڭ سالدارىنان ولار سۋسىز، جەدەلساتىسىز قالادى. سونىمەن قاتار، سىرتقى كابەل جەلىلەرىنىڭ ساپاسى جانە ءورت قاۋىپسىزدىگى جۇيەسىنىڭ سايكەسسىزدىگى ماسەلەسى كوتەرىلدى.
قالالىق تجد باستىعىنىڭ ايتۋىنشا، تەكسەرۋ بارىسىندا بۇرىن 18 بۇزۋشىلىق انىقتالعان، ونىڭ 15ء-ىن قۇرىلىس سالۋشى جويعان. الايدا ءورت ءسوندىرۋ جۇيەسىنە قاتىستى كەيبىر بۇزۋشىلىقتار شەشىلمەگەن كۇيىندە قالدى. ولاردىڭ ءىسى سوتقا جىبەرىلدى، ال تۇرعىنداردىڭ وتىنىشىمەن قايتا تەكسەرۋ جۇرگىزىلەدى.
«اجك» اق ءوندىرىس جونىندەگى اتقارۋشى ديرەكتورى مەكەمە ينجەنەرلىك جەلىلەردى يەسىز دەپ تانىپ، سەنىمگەرلىك باسقارۋعا بەرىلگەننەن كەيىن عانا يەلىگىنە الۋعا دايىن ەكەنىن اتاپ ءوتتى.
دارحان ساتىبالدى تۇرعىن ءۇي كەشەنى جايى ۇجىمدىق مەنشىك ايماعىندا ەكەنىن، الايدا قالاداعى ماسەلەلەر بويىنشا شەشىم شىعارۋعا دايىن ەكەنىن اتاپ ءوتتى.
«ءبىز تۇرعىنداردىڭ الاڭداۋشىلىعىن تۇسىنەمىز. ترانسفورماتورلىق قوسالقى ستانسيا بويىنشا جۇمىس ەنەرگەتيكا باسقارماسىمەن بىرلەسىپ جۇرگىزىلەدى. التى اي ىشىندە نىسان يەسىز دەپ تانىلادى، سودان كەيىن ول ەنەرگيا بەرۋشى ۇيىمنىڭ بالانسىنا بەرىلەدى. ورتكە قارسى جۇيەگە قاتىستى ماسەلە دە باقىلاۋعا الىنىپ، تجد قاتىسۋىمەن تەكسەرۋ جۇرگىزىلەدى»، - دەدى الماتى اكىمى.