ەلىمىزدە ەنەرگەتيكا مينيسترلىگىنىڭ بەنزين مەن ديزەل وتىنىنىڭ شەكتىك باعاسى تۋرالى بۇيرىعى كۇشىنە ەندى، دەپ حابارلادى اlmaty-akshamy.kz BAQ.KZ-كە سىلتەمە جاساپ.
– اي-92 جانە اي-93 بەنزيندەرى ءۇشىن ليترىنە 205 تەڭگەگە دەيىن؛
– ديزەلدىك وتىنعا ليترىنە 295 تەڭگەگە دەيىن.
جانارمايدىڭ كەيبىر تۇرلەرىنە جاڭا بولشەك ساۋدا باعاسىن بەلگىلەۋ ءماجبۇرلى شارا بولىپ تابىلادى. بۇل ەلدەن مۇناي ونىمدەرىنىڭ كەتۋىن ازايتىپ، ىشكى نارىقتىڭ ءوسىپ كەلە جاتقان قاجەتتىلىگىن قامتاماسىز ەتەدى.
ەنەرگەتيكا مينيسترلىگى قازاقستاندا جانار-جاعارماي باعاسى 2021 جىلدىڭ كۇزىنەن بەرى وزگەرمەگەنىن اتاپ ءوتتى.
كوكتەمگى ەگىس جۇمىستارى اياقتالعانشا ديزەل وتىنىنىڭ قۇنى وزگەرمەيدى. وپەراتورلاردىڭ شىعىندارىن ەسەپكە العاندا، رەسپۋبليكاداعى شارۋالار ءۇشىن ورتاشا باعا ليترىنە 204 تەڭگەنى قۇرايدى، بۇل نارىقتاعى باعادان 31 پايىزعا تومەن. كوكتەمگى دالا جۇمىستارىنا وڭىرلەرگە 419 مىڭ توننا ارزانداتىلعان ديزەل وتىنى ءبولىندى، بۇل ءبىر جىل بۇرىنعىدان 19 مىڭ تونناعا ارتىق، – دەدى مينيسترلىك.
بۇل رەتتە، ديزەل وتىنىنىڭ بۇرىن بەلگىلەنگەن باعاسى وزگەرىسسىز قالعانى اتاپ ءوتىلدى. اتاپ ايتقاندا، قازاقستان ازاماتتارى جۇرگىزۋشى كۋالىگىن كورسەتكەن كەزدە ءليترى 295 تەڭگەدەن تاۋلىگىنە 100 ليتر ساتىپ الا الادى. جۇك كولىكتەرى، ارنايى، مامانداندىرىلعان كولىكتەر مەن اۆتوبۋستار ءۇشىن، سونداي-اق قازاقستان رەسپۋبليكاسىندا كولىك قۇرالىن تىركەۋ تۋرالى كۋالىكتى كورسەتكەن كەزدە وسىعان ۇقساس باعا بويىنشا تاۋلىگىنە بەكىتىلگەن ليميت 300 ءليتردى قۇرايدى. قالعان ساناتتاعى تۇلعالار ءۇشىن، سونداي-اق ديزەل وتىنىن بەلگىلەنگەن ليميتتەن جوعارى ساتىپ الاتىندار ءۇشىن باعا ليترىنە 450 تەڭگەنى قۇرايدى.