بەلگيالىقتار اسىراپ العان 23 جاستاعى جانىبەك ساۆەليەۆ قىركۇيەكتە ەلگە كەلگىسى كەلگەنىن، الايدا كەدەرگىلەر پايدا بولعانىن ايتتى، - دەپ حابارلايدى aqshamnews.kz ءتىلشىسى.
"ارمىسىزدار، مەنىڭ وتباسىم! قالدارىڭىز قالاي؟ 2026 جىل تاياپ قالدى! بيىل كوپشىلىگىڭىز مەنەن قىركۇيەكتە قازاقستانعا نەگە كەلمەگەنىمدى سۇرادىڭىزدار. وسى جايتتى سىزدەرگە تۇسىندىرگىم كەلەدى، ءبىراق ەڭ الدىمەن تۋعان جەرىمە نە سەبەپتى بارعىم كەلگەنىن ايتايىن. ءبىزدىڭ وتانىمىز سونداي ادەمى - مادەنيەتى باي، تابيعاتى كەرەمەت، تاريحى تەرەڭ. مەن حالقىمىز قازاقستاندى تانىپ ءبىلۋى ءتيىس دەگەن ويدامىن جانە ولارعا تۋعان جەرىمىزدىڭ اسەمدىگىن پاش ەتەتىن ساياحات ۇيىمداستىرعىم كەلدى. مەنىڭ ارمانىم ءبىر توپ اداممەن تۋعان جەردىڭ ادەمى جەرلەرىن تانىپ ساياحاتتاۋ جانە ءوزىم ءۇشىن دە ونىڭ جاڭا قىرلارىن اشۋ بولاتىن"، - دەدى ول.
جانىبەكتىڭ ايتۋىنشا، كومپانيا تۋر باعاسىن دۇرىس ۇسىنباعان.
"وكىنىشكە قاراي، مەن بىرلەسىپ جۇمىس ىستەۋدى جوسپارلاعان كومپانيا تۋردىڭ (ءقوناقۇي باعاسى، جول اقىسى) ءادىل باعاسىن ۇسىنا المادى، سوندىقتان تىركەلگەن ادام سانى جەتكىلىكسىز بولدى. بۇل جايت مەن ءۇشىن اۋىرعا سوقتى، ويتكەنى مەن ۇيىمە ورالىپ سىزدەرمەن قايتا قاۋىشقىم كەلدى. دەگەنمەن مەن بۇل تاجىريبەدەن كوپ نارسەنى ۇيرەندىم جانە ساياحاتتى ۇيىمداستىرۋ يدەياسىنان ءالى دە باس تارتپايمىن. قىمباتتى مەنىڭ وتباسىم، تۋعان جەرىم، سىزدەرمەن جاقىن ارادا كورىسەمىز دەپ ۇمىتتەنەمىن"، – دەپ جازدى جانىبەك.