بەكتەنوۆ ەكى ەكى كوميتەت ءتوراعالارىن جاۋاپكەرشىلىككە تارتۋدى تاپسىردى

پرەمەر-مينيستر ولجاس بەكتەنوۆ وتكىزۋ بەكەتتەرىن جاڭعىرتۋعا قاتىستى جيىن وتكىزدى، - دەپ حابارلايدى Aqshamnews.kz ءتىلشىسى.

قارجى مينيسترلىگى بيىلعى جوسپاردا ەۋرازيالىق ەكونوميكالىق وداقتىڭ سىرتقى شەكارالارىنداعى (قحر، وزبەكستان رەسپۋبليكاسى، تۇرىكمەنستان) 9 وتكىزۋ بەكەتىن رەكونسترۋكسيالاۋ جۇمىستارى تۇرعانىن ايتتى. بۇگىندە ولاردىڭ 4-ەۋىندە، ياعني قاپلانبەك، اتامەكەن، قالجات جانە الاكول بەكەتتەرىندە جۇمىستار اياقتالدى. بەس نىساندى جاڭعىرتۋ جۇمىستارى جىل سوڭىنا دەيىن ءوز مارەسىنە جەتپەك.

"جىبەك جولى" جولاۋشىلار وتكىزۋ بەكەتىن رەكونسترۋكسيالاۋ جوسپاردان تىس جۇرگىزىپ جاتىر، 2026 جىلى ءبىرىنشى جارتىجىلدىقتا اياقتالادى دەپ كوزدەلىپ وتىر.

باياندامالاردى تىڭداعان پرەمەر-مينيستر كەدەن قىزمەتىنىڭ، سونداي-اق، رەسەي فەدەراسياسى مەن قىرعىزستان رەسپۋبليكاسى شەكارالارىنداعى اۆتوموبيل وتكىزۋ بەكەتتەرىن جوندەۋ مەرزىمدەرى كەشىكتىرىلۋىنە بايلانىستى سالالىق مينيسترلىكتەر جۇمىسىن سىنعا الدى.

ولجاس بەكتەنوۆ ق ر قارجى مينيسترلىگى مەملەكەتتىك كىرىستەر كوميتەتى مەن ق ر كولىك مينيسترلىگى اۆتوموبيل جولدارى كوميتەتىنىڭ ءتوراعالارىن جۇمىستارىن ءتيىستى دەڭگەيدە ۇيىمداستىرماعانى ءۇشىن جاۋاپكەرشىلىككە تارتۋدى تاپسىردى.

سونىمەن قاتار، مينيسترلىكتەردىڭ جاۋاپتى باسشىلارى جەرگىلىكتى جەرلەردە جۇمىستى ۇيلەستىرۋ ءۇشىن وڭىرلەرگە جىبەرىلدى. كەدەن قىزمەتىنىڭ كادر قۇرامىنا، اسىرەسە، وتكىزۋ بەكەتتەرىنە قاتىستى تالاپتاردى قاتاڭداتۋ، سونداي-اق، جابدىقپەن جاراقتاندىرۋ جانە ينتەرنەت جەلىسىنە قولجەتىمدىلىكتى قامتاماسىز ەتۋ ماسەلەلەرى بويىنشا مىندەتتەر قويىلدى.

كولىك، قارجى مينيسترلەرىنە وتكىزۋ بەكەتتەرىن رەكونسترۋكسيالاۋ بارىسى تۋرالى پرەمەر-مينيسترگە اپتا سايىن ەسەپ بەرۋ تاپسىرىلدى.