الماتىداعى مەملەكەتتىك تابيعي ەسكەرتكىش – باۋم توعايى اۋماعىندا قالانىڭ ۋربانيستيكا ورتالىعىنىڭ وكىلدەرى بەلسەندى قالا تۇرعىندارى جانە وزگە دە قوعام وكىلدەرىمەن كەزدەستى. باسقوسۋدا توعاي اۋماعىن اباتتاندىرۋ جوباسى تالقىلاندى.
كەزدەسۋ بارىسىندا الەۋمەتتىك زەرتتەۋلەردىڭ ناتيجەلەرى مەن الداعى قايتا جاڭارتۋ تۇجىرىمداماسى ۇسىنىلدى. قاتىسۋشىلار پىكىر الماسىپ، جوبا اياسىندا توعايدىڭ تابيعي ەكوجۇيەسىن ساقتاۋ ماڭىزدى ەكەنىن اتاپ ءوتتى.
جوبانىڭ نەگىزگى ەلەمەنتتەرى تابيعي تەپە-تەڭدىكتى ساقتاۋعا باعىتتالعان ەكولوگيالىق ايماقتارعا ءبولۋ، جاسىل جەلەكتى ساقتاۋ جانە قالپىنا كەلتىرۋ، اپاتتى جاعدايداعى اعاشتاردان كەزەڭ-كەزەڭىمەن تازارتۋ، اۋرۋلار مەن زيانكەستەرگە قارسى كۇرەس، جاڭا كوشەتتەر وتىرعىزۋ جۇمىستارىن قامتيدى. سونداي-اق، ەكوجۇيەنى قالپىنا كەلتىرۋگە ەرەكشە نازار اۋدارىلىپ وتىر: ارىق جۇيەسىن جاڭارتۋ، جابايى جانۋارلاردىڭ تىرشىلىك ەتۋ ورتاسىن قورعاۋ، توعايدى باسقاراسۋ وزەنىمەن بايلانىستىرۋدى جاقسارتۋ جوسپارلانعان.
بۇعان قوسا، قاۋىپسىزدىكتى قامتاماسىز ەتۋ شارالارى قاراستىرىلعان: جارىقتاندىرۋ جۇيەسىن ورناتۋ، پاترۋل قىزمەتىن ۇيىمداستىرۋ جانە اۆتوكولىك كىرۋىن باقىلاۋ. رەكرەاسيالىق ينفراقۇرىلىمدى دامىتۋ اياسىندا تابيعي ورتاعا بارىنشا از زيان كەلتىرە وتىرىپ، ەكولوگيالىق سوقپاقتار، تىنىش دەمالىس ايماقتارى، بالالار جانە سپورت الاڭدارىن سالۋ كوزدەلىپ وتىر. جوبادا اعارتۋشىلىق باعىت تا ماڭىزدى: ۆيزيت-ورتالىق، اقپاراتتىق تاقتالار، وقۋشىلارعا بيولوگيا ساباقتارىن وتكىزۋ جانە ەكولوگيالىق سانانى قالىپتاستىرۋعا قولداۋ كورسەتۋ جوسپارلانعان.
جوبانى ىسكە اسىرۋ بارىسىندا تۇرعىندار مەن ساراپشىلاردىڭ پىكىرى ەسكەرىلەتىنى اتاپ ءوتىلدى. الداعى ۋاقىتتا توعاي اۋماعىندا مامانداردىڭ قاتىسۋىمەن اشىق تالقىلاۋلار مەن باسپا ءسوز تۋرى ۇيىمداستىرىلادى.