الماتى قالاسىنىڭ اكىمى دارحان ساتىبالدىنىڭ توراعالىعىمەن وتكەن كەڭەستە قالانىڭ جارىقتاندىرۋ جۇيەسىنىڭ شەبەر جوسپارىنىڭ جوباسى تانىستىرىلدى.
قۇجات قالانىڭ بارلىق اۋماعىن جانە نەگىزگى كولىك باعىتتارىن قامتىپ، زاماناۋي قاۋىپسىزدىك، ەنەرگيا ۇنەمدىلىك جانە ۆيزۋالدى قابىلداۋ تالاپتارىنا ساي كەلەتىن سىرتقى جانە ساۋلەتتىك جارىقتاندىرۋدىڭ ءبىرىڭعاي جۇيەسىن قالىپتاستىرۋعا باعىتتالعان.
تالقىلاۋ بارىسىندا اكىم جارىقتاندىرۋ ستراتەگياسى قاعاز جۇزىندە قالماي، ناقتى ناتيجە بەرەتىن جۇيە بولۋى كەرەكتىگىن باسا ايتتى.
«ءقازىر ءبىز ءارتۇرلى ەلدەن بىلىكتى مامانداردى تارتىپ جاتىرمىز. ءوزىم دە بۇل ءىستى ءجىتى باقىلاۋعا الامىن، كەشكى ۋاقىتتا نىسانداردى ارالاپ، جارىقتىڭ شىن مانىندە حالىق ءۇشىن قالاي قىزمەت ەتىپ جاتقانىن كورىپ، باعالايمىن»، - دەدى دارحان ساتىبالدى.
اكىمنىڭ ايتۋىنشا، جارىقتاندىرۋدىڭ شەبەر جوسپارى ساۋلەت، قاۋىپسىزدىك پەن زاماناۋي تەحنولوگيا توعىسقان جۇيەلى شەشىم. بۇل رەتتە، حالىقارالىق ستاندارتتارعا ساي بولۋ جانە الماتىنىڭ تاريحي كەلبەتىن ساقتاۋ نەگىزگى باسىمدىقتاردىڭ ءبىرى.
شەبەر جوسپار «Atlas Global KZ» كومپانياسىنىڭ قاتىسۋىمەن ازىرلەنىپ جاتىر. جوبا بارىسىندا ماسكەۋ، لوندون، ليون، سەۋل، يزمير سەكىلدى الەمنىڭ ءىرى قالالارىنداعى تاجىريبە سارالانىپ، الماتىنىڭ ەرەكشەلىكتەرىنە ساي بەيىمدەلىپ ۇسىنىلىپ وتىر.
قۇجاتتا كوشە مەن قوعامدىق كەڭىستىكتەردى جارىقتاندىرۋدى جۇيەلى تاراتۋ، ساۋلەتتىك جانە وقيعالىق جارىقتاندىرۋدى دامىتۋ، جارىقتىق لاستانۋدى ازايتۋ، سىرتقى جارىقتاندىرۋدى «اقىلدى قالا» جۇيەسىنە بىرىكتىرۋ، سونداي-اق تۇنگى ۋاقىتتا، اسىرەسە ايەلدەر، بالالار مەن مۇمكىندىگى شەكتەۋلى جانداردىڭ قاۋىپسىزدىگىن قامتاماسىز ەتۋگە باسا نازار اۋدارۋ كوزدەلگەن.
جوسپارعا ساي، 2025 جىلدىڭ سوڭىنا دەيىن الماتىنىڭ بارلىق كوشەسى تولىق جارىقتاندىرىلادى. بۇل تۇنگى قاۋىپسىزدىكتى ارتتىرىپ قانا قويماي، قالا ءومىرىنىڭ كەشكى تىنىسىن جانداندىرۋعا – ءتۋريزمدى دامىتۋعا، ءدامحانالار مەن دۇكەندەردىڭ، شاعىن بيزنەستىڭ وركەندەۋىنە جول اشادى.
كەڭەس سوڭىندا قالا اكىمى ەنەرگەتيكا جانە سۋمەن جابدىقتاۋ باسقارماسىنا جانە «الماتى قالا جارىق» مەكەمەسىنە شەبەر جوسپاردىڭ ورىندالۋىن تۇراقتى باقىلاۋدا ۇستاۋدى جانە قولدانىستاعى نورماتيۆتىك قۇجاتتارعا قاجەتتى تولىقتىرۋلار مەن وزگەرىستەر ەنگىزۋدى تاپسىردى.