بەيىتكە ارنالعان جەر تەلىمدەرى ساتىلمايدى

پرەمەر-مينيستر ولجاس بەكتەنوۆ سەنات دەپۋتاتى اندرەي لۋكيننىڭ ساۋالىنا وسىلاي دەپ جاۋاپ بەردى. 

دەپۋتاتتىڭ ساۋالىندا بەيىتكە ارنالعان جەر تەلىمدەرىن زاڭسىز بەرىپ، ساتقاندارعا جازا تاعايىنداۋ قاجەتتىگى كوتەرىلگەن بولاتىن، دەپ حابارلايدى aqshamnews.kz.

ۇكىمەت بەيىتكە ارنالعان جەر تەلىمدەرىن زاڭسىز بەرىپ ساتقاندار ءۇشىن اكىمشىلىك جاۋاپكەرشىلىك ەنگىزۋ ماسەلەسىن قاراستىرىپ، زاڭنامالىق اكتىلەرگە قاجەتتى تۇزەتۋلەر ەنگىزۋدى پىسىقتايدى، — دەپ جازىلعان ۇكىمەت باسشىسىنىڭ جاۋابىندا.

سونىمەن قاتار، پرەمەر-مينيستر ءار مارقۇمعا 6 شارشى مەتر جەر مەملەكەتتەن تەگىن بەرىلەتىنىن مالىمدەدى.

جەر كودەكسىنىڭ 109-بابىنىڭ 3-تارماعىنا سايكەس، جالپى قولدانىستاعى جەر قورىنان قايتىس بولعان ادامعا نەمەسە تۇراقتى مەكەنجايى جوق مارقۇمعا جەرلەۋ ءۇشىن 6 شارشى مەتردەن كەم بولمايتىن جەر تەلىمى تەگىن بەرىلەدى، — دەدى ولجاس بەكتەنوۆ.

جاۋاپتا، سونداي-اق، ءدىني راسىمدەرمەن بايلانىستى قىزمەتتەردىڭ الەۋمەتتىك ماڭىزى بار تاۋارلار مەن قىزمەتتەر قاتارىنا جاتپايتىنى جانە ولاردىڭ باعاسىن مەملەكەت رەتتەمەيتىنى ايتىلعان.

بۇل قىزمەتتەر نارىعىندا ليسەنزيالاۋ مەحانيزمدەرى جوق بولعاندىقتان، بەيىت اۋماعىندا كورسەتىلەتىن قىزمەتتەردىڭ باعاسىن قىزمەت كورسەتۋشىلەر وزدەرى بەلگىلەيدى، — دەلىنگەن جاۋاپتا.

بەيىتكە ارنالعان بوس جەر تەلىمدەرىن انىقتاۋ ءۇشىن جاريا كاداسترلىق كارتانى قولدانۋعا بولادى.

جىلجىمايتىن مۇلىك پەن جەرمەن بايلانىستى مامىلەلەردى جاساۋ ءۇشىن جىلجىمايتىن مۇلىكتىڭ ءبىرىڭعاي مەملەكەتتىك كاداسترىنان بوس جانە يەسى بار جەر تەلىمدەرىن ونلاين كورۋگە بولادى، — دەپ جازىلعان پرەمەر-مينيستردىڭ جاۋابىندا.