مەنينگيت — بۇل مي مەن جۇلىننىڭ مەمبرانالارىنا اسەر ەتەتىن ءقاۋىپتى اۋرۋ.
№21 قالالىق ەمحانانىڭ جالپى پراكتيكا دارىگەرى جامبىلحان اياۋلىم بەيبىت قىزى بۇل دەرتتىڭ بەلگىلەرى مەن ءقاۋپى جايلى ەسكەرتەدى، دەپ حابارلايدى aqshamnews.kz.
"بالالاردا مەنينگيت وتە تەز دامىپ، اۋىر جاعدايلاردا مۇگەدەكتىككە نەمەسە ءتىپتى ولىمگە اكەلۋى مۇمكىن. اۋرۋدى ەرتە كەزەڭدە تانۋ وتە ماڭىزدى، ويتكەنى ۋاقىتىندا باستالعان ەم ءومىردى ساقتايدى.
مەنينگيتتىڭ پايدا بولۋىنا ۆيرۋستار، باكتەريالار، زەڭدەر نەمەسە پارازيتتەر سەبەپ بولۋى مۇمكىن. اسىرەسە قىستا جانە كوكتەمدە اۋرۋ ءجيى بايقالادى. كوبىنە اۋا تامشىلى جانە تۇرمىستىق جولمەن بەرىلەدى"،- دەيدى دارىگەر.
مەنينگيت بەلگىلەرىن جرۆي-مەن وڭاي شاتاستىرۋعا بولادى: بالادا جوعارى تەمپەراتۋرا، باس اۋرۋى، قۇسۋ، مۇرىننان سۋ اعۋ بولۋى مۇمكىن. ءبىراق ەرەكشە بەلگىلەر بار:
* قاتتى باس اۋرۋى،
* مويىن مەن كوزدىڭ اۋىرۋى،
* قۇرىسۋلار،
* فوتوفوبيا،
* دەنەدەگى بورتپە (مەنينگوكوكسەميا كەزىندە)،
* نارەستەلەردە-مونوتوندى جىلاۋ، تاماقتان باس تارتۋ، السىزدىك.
كەيدە اۋرۋ تەز باستالادى جانە قىسقا مەرزىمدى جاقسارعاننان كەيىن جاعداي كۇرت ناشارلايدى.
دياگنوزدى تەك تالدامالار (اناليزدەر) ارقىلى ءدال قويۋعا بولادى، سوندىقتان العاشقى مازاسىزدىق بەلگىلەرى پايدا بولعان كەزدە دەرەۋ دارىگەردىڭ قابىلداۋىنا بارۋ كەرەك.
مەنينگيت انتيبيوتيكتەرمەن ەمدەلەدى، ءبىراق باستىسى — ۋاقىتتى جىبەرىپ الماۋ.
ءوزىڭىزدى جانە بالالارىڭىزدى قورعاۋ ءۇشىن:
* قولىڭىزدى جۋىڭىز،
* كوكونىستەر مەن جەمىستەردى جاقسى وڭدەڭىز،
* تەك قايناتىلعان نەمەسە بوتەلكەدەگى سۋدى ءىشىڭىز،
* سۋىق مەزگىلدە ادامدار كوپ جينالاتىن جەرلەردەن اۋلاق بولىڭىز،
* بولمەلەردى جەلدەتىڭىز.